A Eurocámara comprométese co persoal da CRTVG en folga a comprobar se o anteproxecto da Lei de medios públicos da Xunta respecta a lexislación
A xornada vixésimo terceira de folga na CRTVG foi “intensa”, sobre todo fóra das fronteiras galegas. Mentres en Compostela as traballadoras que secundaron o paro desta cuarta feira conseguiron de novo frear a emisión do programa O Termómetro, membros do comité intercentros que conforman o comité de folga interrompían o pleno da Comisión Europea en Estrasburgo, no que se votaba a elección dos novos comisarios que acompañarán na Presidencia a Ursula Von der Leyen, para protestar con camisolas negras sobre a situación que atravesa a CRTVG e chamar a atención dos e das eurodeputadas sobre a mesma.
A protesta enmárcase na viaxe que realizaron as representantes do persoal mobilizado á sede formal do Parlamento Europeo para divulgar a problemática dos medios públicos galegos, que resumen en “privatización, externalización e manipulación”. A delegación, convidada pola eurodeputada do BNG, Ana Miranda, mantivo na terza e cuarta feiras encontros co vicepresidente do Parlamento Europeo, Yonous Omarjee; coa eurodeputada ponente da Lei de Liberdade de Prensa Europea (European Media Freedom Act-EMFA), Diana Riba; co tamén vicepresidente Nicolae Stefanut, responsábel de temas democráticos; e coa presidenta da Comisión de Cultura, Nela Riehl.
Nesas xuntanzas, nas que trasladaron de primeira man información sobre a “grave situación” da CRTVG, as representantes do comité de folga recibiron “importantes apoios e o compromiso desas altas responsábeis da Comisión Europea de que permanecerán vixiantes sobre o anteproxecto de Lei de medios públicos” que presentou en agosto o Goberno galego, que en opinión das traballadoras da CRTVG podería supor o “incumprimento de varios artigos da EMFA” relacionados coa independencia, a pluralidade e o nomeamento da dirección.
A delegación que viaxou a Estrasburgo mantivo tamén un encontro co eurodeputado galego do PSdeG Nicolas González Casares e recibiu azos de Pernando Barrena, Isa Serra, Irene Montero, Jaume Asens, Vicent Marsá, Catarina Martins, Estrella Galán e a mesma Diana Riba, entre outros.
