Un estudo indica que o Aplidin é cen veces máis potente que o actual tratamento contra a Covid e dispara Pharmamar en Bolsa
O Aplidin, o antiviral da biotecnolóxica PharmaMar (fundada como subsidiaria da galega Zeltia, á que acabou absorbendo), recibe un importante pulo cos primeiros resultados dun estudo internacional publicado na prestixiosa revista Science.
O estudo indica que este fármaco, concibido inicialmente para tratar o cancro, é cen veces máis potente que o remdisivir, o tratamento que se está usando actualmente contra a Covid-19. Segundo este estudo, o Aplidin bloquea o virus independientemente de cal sexa a súa cepa.
As accións de PharmaMar disparábanse en Bolsa máis dun 15% nos primeiros compases da sesión de hoxe despois do informe publicado na revista científica Science. En concreto, os títulos da compañía anotábanse unha suba do 15,1% pasadas as 10:00 horas, até intercambiarse a un prezo de 100,9 euros.
O articulo relata que "a actividade antiviral de plitidepsina contra o SARS- CoV-2 prodúcese mediante a inhibición da coñecida diana eEF1A" e engade que plitidepsina 'in vitro' demostrou unha "forte" potencia antiviral, en comparación con outros antivirais contra o SARS- CoV-2, cunha toxicidade limitada.
Así, en dous modelos animais diferentes de infección por SARS- CoV-2 o ensaio demostrou a redución da replicación viral, o que resultou nunha diminución do 99% das cargas virais no pulmón dos animais tratados con plitidepsina.
O estudo tamén afirma que, aínda que a toxicidade é unha preocupación en calquera antiviral dirixido a unha proteína da célula humana, o perfil de seguridade de plitidepsina está ben establecido en humanos e, que as doses ben toleradas de plitidepsina utilizadas no ensaio clínico Covid-19, son "significativamente máis baixas" que as utilizadas nestes experimentos.
Esta publicación foi froito da colaboración entre PharmaMar e os laboratorios de Kris White, Adolfo García-Sastre e Thomas Zwaka, nos Departamentos de Microbioloxía e de Bioloxía Celular, Rexenerativa e do Desenvolvemento, na Icahn School of Medicine; de Kevan Shokat e Nevan Krogan, no Instituto de Biociencias Cuantitativas da Universidade de California San Francisco, e de Marco Vignuzzi no Instituto Pasteur de París.