O lume castiga con forza o país nun momento no que a dispoñibilidade de auga nos encoros é cativa e comezan a decretarse prealertas por episodios de seca en lugares como a contorna do río Lérez.
Esta sexta feira, 5 de agosto, o risco de incendios é extremo na meirande parte do territorio galego, e só na Mariña e arredores é baixo ou moderado.
As reservas de auga nos encoros da Galiza están actualmente a 52,7% da súa capacidade, catro puntos menos que na mesma semana de 2021 e case 20 menos que a media da última década nesta altura do ano, 71,3%. Na demarcación hidrográfica Galiza-Costa os encoros gardan 63,4% de auga, cando o rexistro habitual é de perto de 75%.
Porén, a situación é especialmente grave na bacía Miño-Sil, que se atopa a 51,2% da súa capacidade. O dato medio dos últimos dez anos nesta semana do ano é de 69,1%.
Así, os encoros de maior tamaño desta demarcación fican por baixo da metade do total de auga que poden reunir: 40,1% en Belesar e apenas 23,5% en Portas.
Baleirado de encoros
Cómpre lembrar neste senso que o pasado ano as eléctricas Iberdrola e Naturgy ficaron no foco da polémica polo baleirado de encoros en plena época estival no Miño-Sil, unha cuestión que chegou a instancias da Fiscalía após a denuncia presentada por Adega.
