Eleccións na USC: a ex candidata a reitora Alba Nogueira desvela o seu posicionamento na segunda volta
O 11 de marzo será a segunda volta das eleccións á Reitoría da USC. Hai dúas candidatas: Rosa Crujeiras e Maite Flores. Alba Nogueira, que quedou cuarta na primeira volta anuncia agora cal será o seu sentido de voto.
Colectivo Proxecto Universidade, o equipo da catedrática de Dereito Administrativo Alba Nogueira -candidata á Reitoría da USC pero que quedou fóra da segunda volta que decorrerá o 11 de marzo- anunciou nun comunicado cal será o seu posicionamento nas urnas. Tras a reunión mantida na quinta feira para decidir se solicitaba o voto por Rosa Crujeiras, que obtivo 41% de apoio na primeira volta, ou por Maite Flores, a segunda con maior apoio, desvela que, finalmente, decidiron non apoiar ningunha das dúas.
Tal e como expuxeron, a interlocución coas candidatas "non lles ofreceu garantías" de cumprimento dos obxectivos programáticos e transmitiulles "certa incomprensión" nalgún caso do sentido e o modo que o diálogo debe ter na Universidade.
O equipo de Nogueira subliñou que a pesar de "non apoiar as candidaturas", mostraron "desde o primeiro momento" a súa disposición para falar coas dúas candidatas máis votadas e presentarlle a ambas un conxunto de puntos que consideraban "esenciais", pedíndolles un "posicionamento público expreso".
En concreto, estes puntos son: Un compromiso explícito co equilibrio entre investigación e docencia en todas as áreas dá USC; un diagnóstico claro sobre o estado da autonomía universitaria e un compromiso firme de defendela, e a recondución do proceso de reforma estatutaria sobre a base de principios democráticos e de deliberación colectiva.
Con respecto a estes aspectos, sinalaron que a candidatura de Rosa Crujeiras "non respondeu nin expresou publicamente un posicionamento claro" nos puntos solicitados, mentres que Maite Flores fixo chegar este 6 de marzo un documento -o que agradeceron- no que "recollía algún dos puntos e deixaba fóra significativamente outros".
Por todo iso, considerar que o seu programa "non se ve representado por ningunha das dúas candidaturas en disputa" e deixan á consideración das persoas que os integran a decisión de votar en branco ou pola opción que consideren "menos lesiva" para os intereses da USC. Igualmente, remarcan que "non consideran positiva a abstención".
Finalmente, reafirman o seu "compromiso" de continuar traballando polo "ben común da universidade" desde os distintos órganos colexiados nos que están representados.
A primeira volta foi o pasado 12 de febreiro, con catro mulleres á fronte das candidaturas. As catro aspiraban a ser a primeira muller en ocupar o cargo na historia da institución. Agora, unha nova volta agarda á comunidade educativa o próximo 11 de marzo para descubrir, de forma definitiva, o nome que, de completarse o mandato, ocupará o posto durante os vindeiros seis anos.
Rosa Crujeiras saíu vencedora da primeira rolda, ao obter 41% dos votos ponderados, correspondentes con 985 sufraxios. En segundo lugar, e a unha distancia considerábel, situouse Maite Flores, con 21% e 536 votos ponderados, a mesma porcentaxe que María José López Couso (malia que con 503 votos), mentres que Alba Nogueira quedou na última posición con 15% e 380 votos ponderados. En todo caso, ao non acadar ningunha candidata co 50% necesario para proclamarse reitora, fíxose precisa a segunda volta entre as dúas aspirantes máis votadas.
Crujeiras incorpora o doutor González Juanatey
Pola súa parte, a candidata a reitora Rosa Crujeiras anunciou a incorporación do doutor José Ramón González Juanatey ao seu equipo como delegado para a Estratexia de Ciencias da Saúde.
Nunha nota de prensa, destacou que o cardiólogo é "un referente indiscutíbel no campo biosanitario" e explicou que asumirá a responsabilidade de coordinar e impulsar a política académica e investigadora da USC neste ámbito.
Así, Crujeiras expuxo que nos próximos anos vai afrontar "o reto estratéxico de consolidar e fortalecer o sistema de formación e investigación de excelencia en Ciencias da Saúde" que, engadiu, "desde a USC para todo o país, vén construíndo ao redor dos nosos centros docentes e de investigación, en estreita colaboración co Hospital e co Instituto de Investigación Sanitaria".
Tamén fixo fincapé na necesidade de dotar a USC dunha resposta institucional "máis sólida e coordinada" nun momento "crave" para o futuro dos estudos da Saúde na Galiza.
"A recente controversia ao redor do Grao de Medicina puxo de manifesto a necesidade de reforzar unha resposta institucional sólida, coordinada e transversal que preserve o papel protagonista da USC na formación do persoal sanitario na Galiza, e tamén na investigación de vangarda no ámbito biosanitario que estamos a desenvolver", sinalou.
Neste contexto, Crujeiras subliñou que a incorporación de González Juanatey responde á necesidade de dispor dun liderado "solvente e de recoñecido prestixio" para afrontar estes desafíos.
