As denuncias por violencia machista aumentaron na Galiza 3% no primeiro trimestre de 2023

Os xulgados galegos recibiron no primeiro trimestre do ano 1.747 denuncias por violencia de xénero, 3% máis que no primeiro trimestre do ano pasado, cando se presentaron 1.695, segundo informaron fontes do Tribunal Superior de Xustiza da Galicia (TSXG) a partir dos datos estatísticos do Observatorio contra a Violencia Doméstica e de Xénero do Consello Xeral do Poder Xudicial.

A maioría de denuncias presentadas nos tres primeiros meses do ano, 1.379, chegaron aos xulgados a través de atestados policiais con denuncia da vítima.

Así mesmo, tamén aumentou o número de mulleres que aparecen como vítimas, un total de 1.732, o que supón unha suba de 7,2 % con respecto ao pasado ano.

Deste modo, a taxa de violencia de xénero na Galiza (número de mulleres vítimas por cada 10.000 mulleres) situouse en 12,4 %, a máis baixa do Estado, cuxa media está en 18,4%.

Os distintos órganos xudiciais (xulgados de violencia sobre a muller, xulgados do penal e audiencias provinciais) ditaron no primeiro trimestre 498 sentenzas neste ámbito, das que 80% foron condenatorias. Entre xaneiro e marzo, os xulgados de menores axuizaron a dúas persoas por delitos relacionados con violencia sobre a muller.

Segundo os datos estatísticos feitos públicos esta terza feira, na Galiza aumentaron 17% os casos de vítimas que se acolleron ao dereito a non declarar. No primeiro trimestre optaron por esta opción 103 mulleres, fronte ás 88 que o fixeron o ano anterior.

Medidas de protección

Ademais, no primeiro trimestre solicitáronse ante os xulgados de violencia sobre a muller 495 ordes e medidas de protección da vítima, 9,5% máis que no mesmo período de 2022, cando se demandaron 452.

Delas, foron acordadas 342 (69%), mentres que nos xulgados de garda sen competencia en violencia sobre a muller solicitáronse 122 ordes de protección, das que se acordaron 83.

Con respecto a medidas de protección dos fillos, no primeiro trimestre os órganos xudiciais galegos adoptaron 61 medidas consistentes na suspensión do réxime de visitas, 22% máis que en 2022, cando se adoptaron 50. En total, no primeiro trimestre do ano rexistráronse 23 menores tutelados vítimas de violencia de xénero.