Declaroute Orange como 'moroso'? Isto é o que di un xulgado de Pontevedra ao respecto
O xulgado do mercantil número 1 de Pontevedra declarou abusivas as prácticas de Orange consistentes na inclusión de consumidores en ficheiros de solvencia patrimonial por débedas reclamadas tras a finalización da relación contractual porque os clientes se dan de baixa ou realizan a portabilidade a outro operador.
Isto, cando os consumidores se opoñan ao seu pago sen que nunca antes incorresen en ningunha falta de pagamento do debido á compañía nin fosen incluídos nos ficheiros de solvencia patrimonial por carecer de solvencia ou por presentar risco de morosidade no cumprimento das súas obrigas.
Desta forma, o maxistrado estimou parcialmente a demanda interposta polo Ministerio Fiscal fronte á compañía Orange Espagne e condenouna a cesar de inmediato nas prácticas abusivas descritas, así como a absterse de reiteralas no futuro.
Ademais, ordenou que pague a publicación da resolución da sentenza, pois hai persoas consumidoras afectadas en todo o Estado.
No caso de que reitere as prácticas abusivas prohibidas, segundo estabelece o titular do Xulgado do Mercantil número 1 de Pontevedra na resolución, impoñeránselle multas coercitivas de 60.000 euros por cada reiteración.
Na sentenza, que non é firme, pois contra ela cabe presentar recurso perante a Audiencia de Pontevedra, subliña que a empresa inclúe ex clientes en ficheiros de solvencia patrimonial "polo mero feito de negarse ao pago dunha cantidade facturada, independentemente do motivo da oposición ao pago".
"Práctica habitual"
Así, destaca que Orange veu mantendo "como práctica habitual con antigos clientes que xa se deron de baixa nos seus servizos, mesmo aos que prestaba eses servizos de maneira defectuosa, a de incluír os seus datos en ficheiros de solvencia patrimonial por falta de pagamento de débedas reclamadas unha vez finalizada a súa relación contractual con eles, a pesar de que eses clientes nunca faltaran ao pago doutras débedas con anterioridade".
Ademais, engade que, na maioría dos casos, trátase de débedas de escasa contía.
"Cando a débeda non foi xudicialmente reclamada, unido ao feito de que a persoa afectada nunca incorrera en falta de pagamentos nin fora incluída por outros acredores en ficheiros de morosos con anterioridade, non existe motivo real para dubidar acerca da súa solvencia patrimonial, nin tampouco para poder considerala como alguén que lanza risco de incorrer en morosidade no cumprimento das súas obrigas de pagamento en xeral", recalca o maxistrado.