O Consello de Goberno da Universidade de Vigo (UVigo) aprobou esta cuarta feira o calendario académico do curso 2024-2025, que comezará o 9 de setembro e finalizará o 6 de xuño. O primeiro cuadrimestre será até o 24 de xaneiro, e o segundo comezará o 27 de xaneiro.
Así mesmo, o calendario recolle que o mes de agosto non terá actividade académica, e esta tamén estará suspendida en período de Nadal (entre o 21 de decembro de 2024 e o 7 de xaneiro de 2025) e de Semana Santa (do 14 ao 18 de abril de 2025). A estas datas de vacacións súmanse o 3 e 4 de marzo con motivo do Entroido, a festividade de Santo Tomé de Aquino (28 de xaneiro), así como o patrón de cada centro.
Por outra parte, o período comprendido entre o 1 e o 8 de setembro de 2024 non computará para os efectos de actividades lectivas mais si se poderán desenvolver eses días actividades académicas non lectivas. O mesmo sucederá entre o 9 de xuño e o 31 de xullo de 2025.
Este calendario aplícase a graos e mestrados, mais non aos programas de doutoramento. Excepcionalmente, nas titulacións de mestrado, e previo acordo da respectiva comisión académica -e comunicándoo á Secretaría Xeral-, pódese aprazar o inicio da actividade académica docente lectiva, mais sen que as datas de apertura e entrega de actas se vexan modificadas a causa deste motivo.
Premio Uviguala
Por outra parte, o reitor, Manuel Reigosa, anunciou a concesión do Premio Uviguala ás promotoras da iniciativa 'Elas Fan Cen Tec', que naceu en 2017 da man de docentes e investigadoras das titulacións de enxeñaría e ciencias do campus de Vigo.
Supercomputación
Reigosa tamén informou sobre as reunións mantidas con persoal do Centro de Supercomputación da Galiza (Cesga) sobre o emprego de fondos europeos.
