A Xunta suprime a corentena para estudantes de máis de 12 anos que sexan contacto estreito dun positivo
Aliás, o Goberno galego puntualiza que este cambio no protocolo Covid dos colexios e institutos permitirá camiñar cara a mesma norma que rixe a sociedade en xeral.
Iso si, se as persoas estudantes desta idade non son asintomáticas si terán que atender ás restricións respecto ao illamento.
Se este é o teu caso, ou o dalgún familiar teu, o prazo de corentena pasará dos 10 aos 7 días, como xa acontece coas persoas adultas. En consecuencia, terán permiso para reincorporarse ás clases após unha semana na casa.
Así o comunicaron esta sexta feira os conselleiros de Educación e Sanidade, Román Rodríguez e Julio García Comesaña, respectivamente.
Aínda en análise
Interrogados sobre a posibilidade de que o protocolo sexa o mesmo para as crianzas de menos de 12 anos -en plena campaña de vacinación-, os representantes da Xunta comentaron que o asunto está en "discusión técnica" na Comisión de Saúde Pública.
Así, após o encontro, transcendeu que as aulas non serán fechadas por corentena en ningún nivel educativo agás no caso de que se superen as 5 persoas contaxiadas ou o 20% das asistentes.
Cobertura das baixas
Por outra parte, Rodríguez asegurou que se vai "garantir que os centros sexan espazos seguros" e que o curso se reinicie "coa máxima normalidade posíbel".
"Os nenos teñen menos riscos nas aulas e nos centros que nas súas casas", defendeu. Así mesmo, garantiu que as baixas no profesorado serán cubertas "dun modo inmediato".
No caso das universidades, trabállase nun sistema para que o alumnado contaxiado que non poida acudir a un exame "non perda o dereito para facelo".