Máis de 900 profesionais do servizo de saúde galego deron positivo por coronavirus nas dúas últimas semanas de decembro, segundo un informe do Ministerio de Sanidad citado pola cadena Ser. O documento sitúa Galiza como o segundo territorio do Estado español onde máis positivos se rexistraron entre os sanitarios e sanitarias entre 15 e 30 de decembro. Só Nafarroa presentou un rexistro máis aló, con 1.600 positivos. No total do Estado foron case 7.400.
"O persoal sanitario non é alleo á realidade que hai actualmente na Galiza", apunta a Nós Diario Xosé Dios, médico de Atención Primaria e integrante da plataforma SOS Sanidade Pública. "Aquí a pandemia está en cifras de contaxios moi altas e iso tamén pasa entre os profesionais da sanidade", indica.
Na mesma liña exprésase María Xosé Abuín, da CIG-Saúde: "Esa cifra é reflexo da sociedade, onde hai un índice de contaxios preocupantes". De feito, engade, a maioría deses positivos non se dan nos centros de traballo, senón que se derivan das interaccións sociais propias destas datas de Nadal, Fin de Ano e Reis.
O preocupante, o impacto nos cadros de persoal
Os positivos no persoal teñen consecuencias en forma de baixa laboral e de cumprimento da corentena, co impacto que iso representa nun cadro de persoal xa de por si "minguado" e "recortado", en palabras de Dios e Abuín.
Só na área sanitaria de Lugo hai por volta de cen profesionais sanitarios de baixa por coronavirus.
Eses centos de positivos, nun cadro de persoal tan reducido, agrava a situación. Non hai relevo para cubrir esas baixas polos recortes de todos estes anos", lamenta a secretaria nacional da CIG-Saúde.
E iso implica máis carga de traballo para o persoal que está operativo, "e que xa leva tempo sobrecargado", e a lóxica repercusión na calidade do servizo que se presta.
"Polo sen cabeza"
"Falta persoal e a Xunta anda a tomar decisións como polo sen cabeza para tapar o que pasou todos estes anos co desmantelamento de servizos como a Atención Primaria, que agora afoga con esta vaga", critica Xosé Dios.
A propia Consellaría de Sanidade recoñece esta falla de persoal cando ten que botar man de persoal xubilado. A principios de semana o Sergas anunciaba que 86 médicas e médicos xubilados ían incorporarse para reforzar a Atención Primaria. A maiores, a decisión de que en 14 centros de saúde da área sanitaria de Vigo só se atendesen urxencias e Covid xustificouse por parte da dirección dese área en que eses servizos quedaron con menos de 50 % dos seus facultativos e nalgún caso incluso de 33 %.
Antes da irrupción desta sexta vaga, que deixou onte na Galiza 59.691 casos activos, desde a Administración galega avaliábase prescindir de boa parte dos profesionais contratados para combater as primeiras ondas da pandemia. O propio presidnete da Xunta, Alberto Núñez Feixoo, recoñecía no Parlamento da Galiza a finais de outubro pasado que 20% dese persoal non ía seguir.