Coronavirus Galiza: case 6.000 novos contaxios e máis de 71.500 activos, mais a presión nas UCI segue a minguar
Segundo os datos actualizados na mañá desta terza feira pola Consellaría de Sanidade, con rexistros até as 18 horas da segunda feira, descenden a 48 as persoas ingresadas en UCI pola Covid-19 na Galiza (-5), mais aumentan a 462 as hospitalizadas noutras unidades (+13), mentres que 70.994 pacientes permanecen en seguimento no seu domicilio a través da Atención Primaria.
Por áreas sanitarias, a presión hospitalaria alíviase en tres lixeiramente: A Coruña-Cee, Ourense-Verín-O Barco e Compostela-O Barbanza; mentres que aumenta nas outras catro: Vigo, Lugo-A Mariña-Monforte, Ferrol e Pontevedra-O Salnés. En concreto, na de Ourense descenden a seis os pacientes Covid en UCI (-1) e a 69 os ingresados noutras unidades (-3); mentres que na da Coruña seguen 13 en críticos (sen cambios) e baixan a 88 os hospitalizados noutras unidades (-3).
Pola súa parte, na de Compostela caen a cinco os pacientes Covid en UCI (-2) e a 71 os ingresados noutras unidades (-1); mentres que na de Vigo, aínda que descenden a 11 o críticos (-1), aumentan a 96 os hospitalizados noutras unidades (+4).
Na área de Lugo baixan a catro os ingresados pola Covid en UCI (-1), pero aumentan a 48 os que se atopan noutras unidades (+6). E nas de Pontevedra e Ferrol non hai cambios nos pacientes das unidades de críticos, con sete e dous, respectivamente; mentres que aumentan a 61 (+6) e a 29 (+4) os ingresados noutras unidades por este coronavirus.
Máis de 71.500 casos activos
Os casos activos da Covid-19 manteñen a tendencia ascendente e exceden a barreira dos 71.000 por vez primeira na pandemia no marco desta sexta vaga, ao situarse en 71.504, que constitúen 3.780 máis que a xornada anterior, o que supón un aumento maior que o día previo, ao haber de novo máis contaxios (5.927) que altas (2.138), ao que se engaden varios falecementos.
Deste xeito, con máis casos activos continúa a área sanitaria de Vigo, con 16.139 (+940); seguida da da Coruña, con 13.623 (+764); Compostela, con 12.615 (+605); Ourense, con 9.175 (+589); Pontevedra e O Salnés, con 8.190 (+261); Lugo, con 7.294 (+419); e á cola mantense a de Ferrol, con 4.468 (+202).
Segundo os últimos datos actualizados polo Ministerio de Sanidad esta pasada segunda feira, a incidencia acumulada a 14 días da Galiza sitúase en 2.926 casos por cada 100.000 habitantes, fronte aos 2.989 de media no Estado español.
Case 6.000 novos contaxios
Os novos contaxios de Covid-19 repuntan aos 5.927, tras comezar esta semana con 4.966, polo que se volve a superar a barreira dos 5.000 —como sucedera o pasado domingo 9 de xaneiro—. A Galiza acumula desde o inicio desta pandemia 294.509 contaxios por coronavirus, dos que 65.874 corresponden á área de Vigo; 62.913, á da Coruña; 44.420, á de Compostela; 37.693, á de Ourense; 35.107, á de Pontevedra; 30.442, á de Lugo, e 18.060, á de Ferrol.
En canto á taxa de positividade en PCR —número de infeccións detectadas cada 100 test—, redúcese a 16,6% despois de comezar esta semana con 22,6%. Con todo, fica por riba do limiar do 5% que fixa a Organización Mundial da Saúde (OMS) para dar por controlada a pandemia.
Falecidos e curados
As persoas falecidas diagnosticadas coa Covid-19 desde o inicio desta pandemia no país ascenden a 2.827, ao notificar Sanidade esta segunda feira dez vítimas máis.
En concreto, Sanidade notificou dez falecidos máis durante a fin de semana, que se suman a outras dúas mortes que foron comunicadas na xornada do domingo —aínda que correspondentes ás últimas horas—. Todas eran maiores de 75 anos e tiñan patoloxías previas. Cinco dos decesos corresponden ao sábado 8 de xaneiro e cinco ao domingo.
Mentres, 220.224 persoas diagnosticadas de coronavirus curáronse en toda a Galiza desde o comezo desta crise sanitaria, que supoñen 2.138 máis que as rexistradas até o día pasado.