Concentracións nunha trintena de localidades contra a agresión ao Irán: "Esta guerra non é un accidente de carácter infantil de Trump"

Unha trintena de localidades galegas, entre elas as sete cidades, acolleron esta terza feira concentracións convocadas pola plataforma Galiza pola Paz baixo o lema "Non á guerra imperialista!". 

"Vimos hoxe [por onte] aquí porque mentres a agresión contra o Irán continúa e multiplícanse as agresións tamén contra o Líbano, o Iemen e a Palestina toda [...] somos os pobos —o pobo galego que sempre sabe colocarse do lado certo da historia— os que nos temos que mobilizar para berrar ben alto que non queremos agresións", sinalábase no manifesto que se leu ao final das concentracións.

As persoas concentradas incidiron coa súa protesta en que "a paz que exiximos non é a paz dos caladiños e caladiñas nin a paz que agarda a seguinte guerra", ao tempo que avogaron "por unha paz real e global. Rematar coa guerra contra o Irán é tan fundamental como acabar coa agresión permanente ao Líbano, tan urxente como deter dunha vez para sempre o xenocidio palestino e a ocupación, tan básico como levantar o bloqueo a Cuba ou liberar o presidente Nicolás Maduro", tal e como recollía o manifesto. 

"Tampouco debemos aceptar outro debate que vén á tona cada vez que as potencias imperialistas se embarcan nunha agresión: o debate que presenta esta guerra como unha irresponsabilidade persoal dos seus dirixentes", indica o escrito lido na trintena de localidades. "Esta guerra non é un accidente de carácter infantil de Donald Trump nin un erro de Goberno, do mesmo modo que o xenocidio palestino en Gaza non responde unicamente aos intereses persoais do asasino Netanyahu".

"O imperialismo e as súas prácticas —a agresión militar, o xenocidio, os bloqueos, os secuestros de dirixentes electos, a guerra comercial, a guerra mediática e psicolóxica— non acontecen porque un pobo escolla este ou aquel gobernante. Acontecen porque o sistema de relacións internacionais leva décadas instalado na lei do máis forte, e porque ese sistema ten nomes, estruturas e beneficiarios que non cambian cunha elección. Os Estados Unidos levan décadas impulsando guerras, golpes de estado, bloqueos e sancións con todas as administracións e a ocupación da Palestina vai camiño de 78 anos", afirma.