O comité clínico confía en eliminar os límites ás xuntanzas en "dúas semanas"
Á reunión de mañá, as e os expertos do comité clínico que asesora á Xunta sobre a evolución epidemiolóxica da Covid-19 van chegar coa idea de suprimir “en dúas semanas” os límites que seguen a existir respecto ao dereito de reunión e á mobilidade nocturna.
É dicir, o obxectivo é falar de como vai a campaña de vacinación e de como evolucionan os contaxios para ter unha primeira conversa sobre a necesidade e as garantías para que as restricións de cantidade de participantes nas reunións desaparezan.
Neste momento, hai diferentes capacidades na hostalaría segundo o chanzo de risco que teña cada municipio, mais nalgúns casos veñen de ampliarse a seis persoas as xuntanzas en interiores e a dez en espazos abertos.
Así o explicou a ex conselleira de Sanidade e directora de Cáritas Interparroquial na Coruña, Pilar Farjas, -que é parte do comité-, que engadiu a idea de que nun futuro breve tampouco haxa limitacións de carácter horario.
Neste sentido, aludiu ás prohibicións nocturnas. Se ben é certo que o toque de recoller só segue activo naqueles concellos aos que se aplica o fechamento perimetral, aínda está activa a restrición de non manter encontros nin nas casas nin no exterior entre a unha e as seis da madrugada.
Pendentes do TSXG
Segundo Farjas, traballan coa expectativa de acadar un risco baixo en todo o territorio para “aliviar as limitacións de dereitos constitucionais”.
A que fora responsábel de Sanidade lembrou, desta forma, que a prohibición de calquera tipo de mobilidade nocturna e de reunión afectan a uns dereitos que recolle a Constitución. Por iso, após decaer o estado de alarma, é o Tribunal Superior de Xustiza da Galiza (TSXG) o que está a avalar as decisións da Consellaría de Sanidade e o comité.
Mentres en localidades como Lobios melloran os datos de expansión do virus, ao grupo asesor preocúpanlle os gromos “escolares, sociais e laborais”, pero especialmente aqueles que se dan na mocidade.
Pola súa banda, o presidente da Xunta, Alberto Núñez Feixoo, incidiu hoxe en que se poden dar pasos adiantes en cambios normativos que impliquen cuestións como que a máscara non sexa obrigatoria en espazos exteriores.