A CIG mobilizouse esta terza feira para reclamar á Consellaría de Cultura, Educación, FP e Universidades que negocie "xa" e "con carácter inmediato" a volta ao horario lectivo anterior a 2011, cando o Goberno do entón presidente, Alberto Núñez Feixoo, elevou de 18 a 21 as horas de clase á semana en ESO e Bacharelato, e de 21 a 25 en Infantil e Primaria.
En declaracións aos medios ás portas da Escola Galega da Administración Pública (EGAP) de Santiago de Copostela, coincidindo co decorrer dunha reunión da Mesa Sectorial, o secretario nacional de CIG-Ensino, Suso Bermello, negou que esta reclamación implique "traballar menos", senón que permitirá exercer "en menores condicións" ou, en todo caso, en "as mesmas" que antes de 2011.
Segundo explicou o responsábel da central nacionalista, o que fixo Feixoo tras chegar á Xunta en 2009 foi "eliminar" o acordo que había co anterior goberno bipartito de PSdeG e BNG, e "impor" estes horarios tal e como se manteñen hoxe, baixo o mandato de Alfonso Rueda.
De feito, tal e como denunciou Bermello, Galiza e a Comunidade de Madrid teñen "os únicos presidentes de comunidades autónomas que manteñen, sen ningún tipo de negociación, os recortes impresionantes de dereitos".
Así, aproveitando a convocatoria este martes da Mesa Sectorial, a CIG concentrouse na entrada da EGAP porque a orde do día desa reunión non recolle "en ningún caso" a posibilidade de dialogar para reducir o horario lectivo e implantala "xa no curso 2023/24", é dicir, en setembro.
É máis, se para entón non se produce "ningún tipo de movemento", Bermello avanza que o seu sindicato, que é maioritario na educación pública galega, promoverá un calendario de mobilizacións. "É o momento de dicir que xa está ben e que non se pode seguir tomando o pelo aos profesores", sentenciou.
“Non hai un peso”
Neste contexto, o titular da CIG-Ensino cuestionou que a Consellaría si teña orzamento para implantar medidas dentro do acordo de recolocación de docentes en centros concertados ou para xeneralizar os chamados 'polos creativos'. "Pero para recuperación dos dereitos de profesorado, non hai un peso", engadiu.
En concreto, en referencia ao acordo coa concertada, Bermello confirmou que a CIG non o asinará porque, entre outras cousas, contempla que a Xunta abone aos colexios até 6.000 euros por cada unidade suprimida para financiar os despedimentos dos profesores.
A isto sumou os 21 millóns de euros que a Xunta destinará a estender a todos os centros financiados con fondos públicos os 'polos creativos', uns espazos de formación STEM, "sen que se saiba como se vai a formar ao profesorado para poder traballar con ese material", segundo censurou Bermello.
O responsable de CIG-Ensino tamén cuestionou a nova figura de 'coordinador de benestar e convivencia' que se introducirá o curso que vén -para cumprir coa lexislación estatal, aínda que a Consellaría argumenta que xa existía un cargo similar- porque a Administración "pretende que se faga a custo cero", sen "pór nin un peso" nin "reducindo horario".
"É unha Administración autoritaria, que non ten ningún tipo de empatía co profesorado e que quere que todo o fagamos pola cara, con voluntarismo", afeou.
A oferta de FP
Noutra orde de asuntos, Bermello criticou a falta de diálogo da Xunta ao redor da normativa e a oferta de FP para o próximo curso, que foi comunicada aos centros "cunha antelación de 24 horas".
Así, cuestionou o aumento das horas de docencia a distancia na formación de adultos e FP porque o que fai -ao seu xuízo- é crear "unha estrutura paralela á administración educativa". Todo iso, segundo a CIG, co obxectivo de "incrementar a matrícula" por "propaganda".
Isto irá acompañado, de acordo co sindicalista, dunha "importante diminución" de postos de traballo e dun "empeoramento da calidade" do ensino.
