A CIG exixe negociar en setembro a redución do horario lectivo e os cocientes nas aulas
A federación de Ensino da Confederación Intersindical Galega (CIG-Ensino) exixe que se negocie durante este mes de setembro a recuperación do horario lectivo para o profesorado galego e a redución das cocientes e da burocracia docente e advirte de que, de non ser así, a situación podería desembocar en "mobilizacións contundentes", incluída unha folga.
Nunha rolda de prensa ofrecida esta quinta feira sobre o inicio do curso escolar, responsábeis do sindicato puxeron o foco na sobrecarga lectiva que afronta o profesorado galego, "o colectivo docente con maior horario lectivo de todo o Estado", así como nas cocientes "avultadas" que non se reducen pese ao momento "oportuno" que "permite unha leve caída na matrícula pola diminución de poboación escolar" ou a necesidade de reducir "de forma determinante" a burocracia que condiciona o traballo diario do persoal docente. "Cuestións centrais que lastran o inicio do curso", aseguran.
Por todo iso, instaron á Consellaría de Educación a sentar a negociar en setembro. De non ser así, "o profesorado terá claro que ante o reiterado desprezo ao profesorado dos responsábeis políticos da Consellaría só caben mobilizacións contundentes, incluída unha folga que a CIG está disposta a convocar, para a que se buscará o maior grao de unidade sindicar e de resposta social posíbel".
Máis pormenorizadamente, piden a recuperación do horario lectivo de 18 e 21 horas, xa que agora contan con 25 horas en infantil e primaria e 20 nos demais niveis educativos. "A redución redundaría na mellora das condicións de traballo, no reforzo da coordinación pedagóxica e na propia atención educativa ao alumnado", argumentaron.
En canto á redución de cocientes, solicitan chegar a 15 alumnos máximo por aula en Infantil, 20 en Primaria e 25 en ESO e Bacharelato, e negociar unha cociente "aceptábel" noutros ensinos en función das súas particularidades. Instan tamén a ter en conta ao alumnado repetidor e con necesidades educativas específicas para reducir a cociente ordinaria, limitar o número de alumnado ao que ten que atender cada docente e autorizar desdobres en determinadas materias lingüísticas e do ámbito científico tecnolóxico.
Outro punto para negociar sería a ampliación da oferta educativa na rede pública, "evitando o fechamento de unidades e a supresión de profesorado". Para iso, solicitan limitar o número total de alumnado que pode ser agrupado en aulas con diferentes niveis educativos, limitar ao mínimo imprescindíbel o número de alumnado de unitarias para manter os centros abertos, limitar os concertos educativos, "considerando a rede concertada como un elemento de carácter supletorio cando a rede pública nunha zona escolar non poida dar resposta á necesidade de matrícula" e controlar o cumprimento por parte dos centros do Opus Dei da escolarización non segregada.
Educación a distancia
Por outra parte, o sindicato tamén alertou da aposta pola educación a distancia en detrimento da presencial. "A decisión adoptada pola Consellaría de reducir a oferta presencial na FP, executada unilateralmente e en contra do criterio da comunidade educativa, evidencia a intención da Xunta de camiñar cara á redución de docentes, nunha manobra que esconde tamén a privatización destas etapas educativas", censuraron.
A CIG demanda a recuperación da oferta fechada neste curso, a potenciación da FP presencial e a retirada do Anteproxecto de Lei de Educación de persoas adultas.
Taxa de interinidade
Por último, o sindicato abordou na rolda de prensa os datos de interinidade, tras a adxudicación dos destinos provisionais para o curso escolar e que, defenden, "poñen en evidencia que a acumulación de xubilacións de dous cursos escolares sitúan a porcentaxe de persoal interino por encima de 8% cando o obxectivo declarado pola propia Consellaría é que non supere 5%".
Así mesmo, critican as cifras de profesorado que imparte materias que non son as propias da súa especialidade, que "segue en máximos, chegando a case un terzo do profesorado sen destino definitivo".
Destacan tamén o "elevado" número de medias xornadas: 123 interinidades de curso completo a media xornada, "un importante incremento sobre cursos anteriores". "Consideramos que a precariedade laboral que implica traballar a media xornada debe limitarse ao mínimo imprescindíbel (cobertura de reducións de xornada) e non para a oferta ordinaria de necesidades de profesorado por parte dos centros", argumentan.