A Xunta da Galiza financiou o ensino privado con 2.496 millóns nos últimos dez anos

A Xunta da Galiza entregou ao ensino privado 2.496,02 millóns de euros nos últimos 10 anos. Segundo os datos achegados polo Ministerio de Facenda, correspondentes aos orzamentos liquidados galegos de 2012 a 2021, último ano con cifras, a Xunta da Galiza incrementou o seu financiamento aos centros concertados en 59,54 millóns de euros nesa década, pasando de 234,04 millóns de euros en 2012 a 302,58 millóns en 2021. Neste sentido, as partidas para a educación privada deron un importante salto adiante a partir de 2017, cando chegaron a 258,90 millóns de euros. O incremento de fondos para os concertos educativos foi ligado a unha redución do financiamento para o ensino público. Se o orzamento da Xunta da Galiza de 2021 destinaba a Educación 2.702,79 millóns de euros, as contas de 2009, as últimas elaboradas polo Goberno de coalición entre o PSdeG e o BNG na Xunta, destinaban a esta materia 2.450,05 millóns de euros, o que representarían na actualidade 3.150,76 millóns, isto é 700,71 millóns máis que o da primeira anualidade. Á cola do Estado A Galiza mantense nos postos de cola do Estado en investimento educativo. Así, o gasto educativo anual por habitante foi inferior en 40 euros á media do Estado en 2012, en 33 euros en 2013, en 38 euros en 2014, en 51 euros en 2015, en 36 euros no ano 2016, en 34 euros no seguinte exercicio, en 48 euros en 2018, en 60 euros en 2019 e en 50 euros en 2020, sendo 60 euros inferior en 2021. Neste sentido, só en 2006, 2007 e 2008, co Goberno de coalición entre o PSdeG e o BNG dirixindo a Xunta, se produciron destacados incrementos no orzamento educativo, con alzas de 7,8% para o primeiro exercicio, de 8,5% para o segundo e de 8,46% para o terceiro. O investimento educativo segue sen recuperar os niveis logrados durante o Goberno bipartito. Mentres as dotacións en Educación estiveron por encima de 26% do orzamento total da Xunta da Galiza no período 2006-2009, o gasto en ensino non superou 21% na anualidade de 2021. Precisamente, as partidas destinadas a ensinanza nese último ano foron as máis elevadas da etapa 2012-2021, cuxa contía mínima se rexistrou en 2017 con 2.027 millóns de euros. Os recortes A redución das dotacións orzamentarias para o ensino público provocaron importantes recortes que afectaron a calidade da prestación. Sen ir máis lonxe, o Goberno galego fechou 186 centros educativos públicos desde 2009, pasando de 1.361 nesa anualidade a 1.175 no curso escolar 2022/2023. Concretamente, a maior caída deuse en Educación Infantil, que reduciu nese período a oferta en 51,2%, sendo 90% do total das escolas que cesaron na súa actividade nese período de titularidade pública. O ensino concertado ficou á marxe deses recortes. Mentres no curso 2008/2009 a Galiza sumaba 3.836 aulas concertadas, a súa cifra chegou a 3.978 no ano escolar 2022/2023, sumando 142 concertos educativos máis e representando un incremento de 3,7% nun contexto de redución da matrícula por razóns demográficas. A maiores a ampliación da oferta educativa concertada focalizouse nos grandes núcleos urbanos, en moitos casos ligados a novos ciclos formativos con significada saída laboral. A este respecto, o secretario de acción sindical da CIG-Ensino, Diego Boquete, denuncia a Nós Diario que “a política de recortes que leva a cabo a Xunta da Galiza non dá tregua” e sinala precisamente que “o Goberno galego acaba de suprimir para o vindeiro ano académico 60 unidades de Educación Infantil e Primaria, que se traducen nun recorte de 89 prazas de Infantil e Primaria, concretamente 38 de Infantil e 51 de Educación Primaria, incluídas nestas, sete en distintos centros de Educación Especial”. Boquete advirte de que “a Consellaría de Educación segue adiante coa política de desmantelamento do ensino público, antepoñendo criterios economicistas á calidade da educación”. Nesta dirección, destaca que “os feches de aulas non chegan ao ensino concertado” e lembra que “a propia Constitución Española abre dúas vías no ensino e estabelece que a concertada debe completar a oferta educativa alí onde a pública non chega. Porén, isto non está acontecendo así e hoxe féchanse prazas na pública e consérvanse na concertada”. O presidente da Confederación de ANPAS galegas, Fernando Lacaci, explica a Nós Diario que “a aposta da Xunta polos concertos é de carácter ideolóxica” e significa que “o ensino concertado sobra, porque fai dano, xera un problema económico ao conxunto da poboación, obrigándoa a pagar dúas veces por unha mesma prestación, e representa un perigo para os cidadás do futuro pola formación que oferta". Unha aposta ideolóxica Lacaci entende “absurdo manter os concertos cando hai unha crise demográfica que está levando ao feche de unidades educativas no ensino público”. A maiores, critica a “ineficiencia económica do ensino concertado porque leva a cidadanía a pagar dúas veces polo mesmo servizo”, defende “a desaparición dos centros concertados, non así dos privados” e denuncia “a falsa intencionalidade da Xunta da Galiza de homologar o ensino público co ensino concertado, coa intención de facerlle pensar ás cidadás e aos cidadás que son idénticos e que fan parte do mesmo sistema”. O investimento educativo na Galiza está nos postos de cola do Estado A política educativa impulsada polo PP desde a Xunta da Galiza veuse caracterizando por recortes no sector público e importantes concesións ao privado. Mentres o financiamento para os centros concertados medrou en 29,1% desde o ano 2012 a 2021, as dotacións caían para o ensino público, até o punto de situarse a Galiza nos postos de cola do Estado. Os últimos datos -referidos a 2021- publicados pola a Autoridade Independente de Responsabilidade Fiscal (Airef), organismo independente de control fiscal creado polo Goberno español a iniciativa da UE, sinalan que o gasto en educación por habitante na Galiza sitúase en 995 euros ao ano -60 euros por baixo da media do conxunto do Estado español, fixada en 1.055 euros-. Só Asturias, Madrid e Castela e León gastan menos que a Galiza. As consecuencias dos recortes orzamentarios percíbense en moitas esferas do sistema educativo. Sen ir máis lonxe, as partidas destinadas polo Goberno galego a bolsas e axudas a educación en 2009, último ano do Executivo bipartito, sumaban 35 millóns de euros; porén, esa contía pasaba a 15,4 millóns de euros no curso 2021/2022, marcando unha baixa de 57% nese período . O Goberno galego está decidido a continuar nesa dirección. Así, fixo pública a semana pasada a decisión de destinar para concertos educativos 1.900 millóns de euros nos próximos seis cursos académicos, para chegar na anualidade escolar 2023/2024 a 3.990 unidades en réxime de concerto, onde a Xunta da Galiza calcula unha matrícula de perto de 82.250 alumnos e alumnas.