Centos de persoas mobilízanse por todo o país contra o último asasinato machista
Menos dunha semana despois das mobilizacións decorridas nunha vintena de localidades para denunciar o "feminicidio de Marisol C.P, en Campo Lameiro (comarca de Caldas), o feminismo galego volveu esta terza feira ás rúas para rexeitar o asasinato de Maritza H. a mans da súa parella na súa vivenda da Coruña o pasado domingo.
No mesmo día en que institucións como o Parlamento da Galiza, concellos, deputacións e delegacións do Goberno español gardaron minutos de silencio por este novo feminicidio, desde a Marcha Mundial das Mulleres (MMM), colectivo convocante das mobilizacións sociais que se produciron esta terza feira en localidades de todo o país , criticaron nun manifesto subdelegada do Goberno español na Coruña, María Ribas, ao consideraren que as institucións "non evitaron" que Maritza fose agredida.
Ribas confirmou que a vítima, que estaba no sistema Vioxén despois de ser agredida polo seu asasino en setembro do ano pasado, non denunciou, pese ao cal iniciouse un procedemento xudicial de oficio que rematou cunha sentenza condenatoria que non impediu que conviviran tras casar ese mesmo mes.
Segundo Ribas, "a vítima non se sentía en condicións de denunciar, pero o sistema reaccionou", centrando a subdelegada, afearon, "todo o seu discurso en defender a acción das institucións" e "obviando que foron as institucións" as que "non só non evitaron que volvese a agredila, senón que o caso rematou en asasinato". Tamén alertaron da "situación de emerxencia total" que perciben na actualidade, con "milleiros de vidas en xogo".
Por estes motivos, convocaron mobilizacións para a vindeira semana diante das sedes do PP, que é quen "ten a responsabilidade de dar exemplo desde as institucións, abordando a violencia coa seriedade e o compromiso que merece, tamén os recursos, e impedindo que se cuestione as vítimas" e se defenda os agresores.
O acusado do crime pasa a disposición xudicial
O acusado de asasinar a coiteladas, "con asañamento", a última vítima mortal do machismo no país, que fora detido o propio día dos feitos –foi el mesmo quen dixo ser o autor do crime e quen alertou no momento a Emerxencias–, pasou esta terza feira a disposición xudicial.
A vítima figuraba no sistema Vioxén debido a unha agresión física que sufrira en setembro pasado e que derivou nun procedemento que o pasado 27 de maio concluíu cunha sentenza condenatoria que incluía unha pena de afastamento que o pasado domingo aínda estaba pendente de notificación.
