Un cento de manifestantes mostran en Vigo o seu apoio ao persoal sanitario de Gaza: "Resistir é salvar vidas"

Ao redor dun centenar de profesionais da Sanidade, así como outros cidadáns e cidadás, concentráronse este sábado en Vigo como mostra de apoio e homenaxe aos profesionais médicos que traballan dando asistencia en Gaza, onde Israel perpetra un masacre que deixa xa máis de 67.000 mortos.

'Resistir é salvar vidas' é unha das consignas que se podía ler nos carteis que portaban os e as manifestantes nas escaleiras do Museo de Arte Contemporánea de Vigo (Marco), na céntrica rúa do Príncipe. Alí, ás 11 horas, convocara 'Pararlaguerra.es' esta acción, que tiña tamén a intención de trasladar o seu apoio á Sumud Flotilla que viaxa a Gaza.

Algunhas das participantes ían vestidas coa bata branca característica do persoal médico e todos tiñan as mans pintadas de vermello para levantalas mentres clamaban distintas consignas, a modo de 'performance'. "A intención era buscar a conxugación da cor vermella e o branco, que son as cores da cruz vermella, para facer esta homenaxe", explica Andreu Romaní, parte de 'Pararlaguerra.es'.

A acción fechárona a lectura de varios textos. Un deles estaba asinado polo anestesista Raúl Incertis e chamaba ao boicot de farmacéuticas con relación con institucións israelís e á ruptura de acordos dos hospitais estatais cos israelís.

Ao acto sumáronse organizacións sanitarias como a Federación de Asociacións para a Defensa da Sanidade Pública (FADSP), SOS Sanidade Pública e Asociación Galega de Medicina Familiar e Comunitaria (AGAMFEC), ademais doutras entidades sociais e políticas como Amnistía Internacional, CXT, PACMA, Esquerda Unida e HOAC.

'Pararlaguerra.es', plataforma creada en outubro de 2023, continuará as súas accións de denuncia do xenocidio en Gaza no Congreso. Alí acudirán a vindeira cuarta feira para pedir que "a unidade que existe na sociedade civil", indica Romaní, se traslade aos partidos políticos e "chamen ás cousas polo seu nome", en referencia á utilización do termo 'xenocidio', que formacións como o PP e Vox prescinden de utilizar.