A Comisión Europea (CE) ratificou que se prosegue co procedemento de infracción contra o Estado español polo incumprimento de seguridade ferroviaria a raíz do accidente de tren en Angrois de 2013 -no que faleceron 80 persoas en Santiago-, de modo que "non se fechará a menos que as autoridades españolas aborden de maneira eficaz as cuestións expostas, e só despois de que a Axencia Ferroviaria Europea verifique que os avances notificados polo Estado español son reais". De tal forma, "este proceso non concluirá antes do fin de 2022".
Así o notificou nun escrito o director da Dirección Xeral de Mobilidade e Transporte da Comisión Europea, Kristian Schmidt, en resposta á Plataforma de Vítimas Alvia 04155, despois da reunión mantida o pasado 13 de xullo cunha representación encabezada polo portavoz da plataforma, Jesús Domínguez, que acudiu coa portavoz do BNG en Europa, Ana Miranda.
No entanto, a CE informa de que arquivará a denuncia en relación a un caso individual de aplicación incorrecta do dereito da Unión Europea (UE), xa que considera que, "polo que respecta a futuras investigacións, as medidas de 2016 corrixiron o asunto". Sobre esta decisión, outorga un prazo de catro semanas ás vítimas para presentar alegacións.
E é que a CE mantén que "as autoridades españolas non levaron a cabo unha investigación totalmente independente de este accidente". "No entanto, hai que ter en conta que, desde a introdución en 2016 de novo lexislación e medidas administrativas para reforzar a independencia, os recursos e as competencias do organismo de investigación español, a Comisión de Investigación de Accidentes Ferroviarios (CIAF), este organismo é plenamente independente. Como organismo independente, a CIAF non ten obriga de reabrir a investigación, a menos que así o ordene un órgano xudicial español", expón Schmidt.
A isto agrega que existe "un asunto en curso ante un órgano xudicial español, e todos os elementos pertinentes do asunto, incluído o informe da Axencia, poden poñerse á disposición do xuíz estatal previa solicitude".
Recentemente, o Tribunal Superior de Xustiza de Madrid estimou parcialmente o recurso contencioso administrativo presentado pola Plataforma de Vítimas Alvia 04155 e ordenou á CIAF que se reúna para analizar e dar resposta á solicitude dunha nova investigación sobre o sinistro no que faleceron 80 persoas.
Auditoría
Na reunión mantida en xullo, a plataforma de vítimas do Alvia 04155 sinalaba que por parte da CE informóuselles de que habería unha auditoría antes de final de ano sobre o procedemento de infracción aberto contra España polo incumprimento da normativa europea de seguridade ferroviaria, un expediente que esta asociación vincula á falta de investigación sobre o accidente de tren de Angrois, no que faleceron 80 persoas.
En 2019, a CE abriu un expediente sancionador contra o Estado español ao considerar que os seus procedementos de control da seguridade ferroviaria "non cumpren os requisitos" que exixe a normativa comunitaria.
