A campaña de doazóns para a defensa xurídica contra Altri supera os 10.000 euros en catro días
Para Adega, esta "rápida e firme resposta cidadá" evidencia a "gran preocupación social" polo impacto ambiental e socioeconómico que, apuntou, "supoñería a instalación da macrocelulosa de Altri en Palas de Rei".
A Asociación para a Defensa Ecolóxica da Galiza (Adega) celebrou onte que a campaña de doazóns para a loita xudicial contra Altri e a Mina de Touro superase en catro días os 10.000 euros. Segundo trasladou a entidade, a campaña superou deste modo 25% do obxectivo mínimo fixado, 39.100 euros nun prazo de tres meses. Ademais, o fondo común da campaña alcanzou xa os 1.000 euros.
Para Adega, esta "rápida e firme resposta cidadá" evidencia a "gran preocupación social" polo impacto ambiental e socioeconómico que, apuntou, "supoñería a instalación da macrocelulosa de Altri en Palas de Rei".
Ademais, a asociación ecoloxista considera que reflicte tamén "o compromiso da sociedade galega coa defensa dos ríos e do territorio fronte a proxectos industriais altamente contaminantes para o conxunto de Galiza".
Por iso, mostrou o seu "profundo agradecemento" a todas as persoas que contribuíron ata o momento coa campaña e fixo un chamamento para seguir sumando apoios para levar o proxecto de Altri e Greenalia aos tribunais.
O obxectivo é que estes fondos permitan a Adega enfrontar "con garantías económicas, técnicas e xurídicas" dous recursos contencioso-administrativos no Tribunal Superior de Xustiza da Galiza (TSXG): a impugnación da Autorización Ambiental Integrada (AAI) do proxecto de Altri anunciada para antes do verán e o recurso contra a denegación da solicitude de arquivo do trámite da concesión de augas "por exceder o prazo máximo para a súa resolución sen que esta producísese".
Por,outra parte, Alfonso Rueda, insistiu esta segunda feira en que achegar fondos para o proxecto da pasteira lusa Altri en Palas de Rei está no tellado do Goberno central e, preguntado acerca de por que non o financia a pesar de considerar que o seu carácter é "estratéxico", agregou que o Goberno autonómico tampouco o fai con outros proxectos "tractores".
"Agora quen ten que decidir se se financia ou non, quen ten a palabra, é o Goberno central", afirmou.
