As árbores do parque 25 de Novembro morren polo abandono do Goberno local de Ourense
O parque 25 de Novembro contra a violencia de machista, situado na parroquia ourensá de Reza, atópase nunha situación de “terríbel abandono” segundo denuncia ADEGA. A entidade ecoloxista galega lamenta que a árbores plantadas na zona de Reza e que representan as vítimas do terrorismo machista non fosen regadas e rematasen por esmorecer e morrer.
Este espazo verde ergueuse como unha homenaxe as vítimas da violencia machista e na actualidade atópase nun “estado lamentábel pola falta de rego e de auga, o que xa provocou a morte de ducias de árbores”, segundo sinalan desde ADEGA.
ADEGA esixiu ao Concello que achegue información sobre a situación e que tome medidas urxentes ante unha situación de abandono tan rechamante
Nese sentido, a entidade ecoloxista galega esixiu ao Concello que achegue información sobre a situación e que tome medidas urxentes ante unha situación de abandono tan rechamante. Solicitan pois o arranxo das árbores e da zona así como un atendemento continuado do parque “polo ben das propias arbores, polos veciños de Reza, e polas vítimas da violencia machista”.
O 24 de novembro do pasado ano 2018 plantáronse na parroquia de Reza un total de 44 árbores e colocouse ao redor de cada unha delas un lazo rosa. O parque novo foi inaugurado polas autoridades municipais co nome 25 de Novembro en recordo das vítimas.
Este espazo verde comprende un total de 35.000 metros cadrados e foi inaugurado co obxectivo de sensibilizar, lembrar e denunciar os asasinatos e combater a violencia machista.