Denunciadas en Fiscalía as obras do parque eólico na Serra do Oribio
As obras foron paralizadas preventivamente pola Xunta após as protestas veciñais e de colectivos ambientalistas. A Serra do Oribio está catalogada como Zona Especial de Conservación ( ZEC Ancares-Courel), dentro da Rede Natura 2000 da Galiza.
Sociedade Galega de Ornitoloxía (SGO) co apoio da Fundación Oso Pardo (FOP), a Asociación para a Defensa Ecoloxica de Galiza (ADEGA) e a Asociación Galega de Custodia do Territorio (AGCT) presentaron una denuncia perante a Fiscalía da Galiza contra as obras de movemento de terras e acondicionamento de pistas iniciadas pola empresa Fergo Galicia Vento, S.L. na Serra do Oribio. Actuacións que foron paralizadas preventivamente pola Xunta o 17 de xuño por non contar con toda a documentación regulamentaria.
Estes colectivos afirman que a construción do parque eólico pretende facerse en base a unha Declaración de Impacto Ambiental aprobada no ano 2005, e desde entón non só cambiaron as circunstancias tecnolóxicas, enerxéticas e ambientais, senón que se aprobou o Plan Director da Rede Natura 2000 na Galiza que, entre outras medidas, prohibe a instalación de novos parques eólicos nos espazos da rede.
Os traballos da maquinaria pesada desfixeron xa un treito importante do Camiño Real de Vilafranca do Bierzo a Monforte, ben patrimonial inventariado, e acometeron salvaxes desbroces que afectan mesmo a exemplares de Quercus Lusitanica (carballo anano), ao tempo que ameazan gravemente outros elementos de gran valor patrimonial e etnográfico: a Medorra do Fial, situada a menos de 400 metros de onde estaban as máquinas, as Ventas da Braña e do Retorno ou o Portádego do Oribio, antigo lugar de dereito de paso, así como algún exemplar de antigo neveiro.
A Serra do Oribio está catalogada como Zona Especial de Conservación ( ZEC Ancares-Courel), dentro da Rede Natura 2000 de Galiza, e como Zona de Especial Protección dos Valores Naturais ( ZEPVN. A zona é unha área importante para diversas especies ameazadas, destacando a presenza da tartaraña cincenta ( Circus pygargus) e a gatafornela ( Circus cyaneus), especies incluídas no Catálogo Galego de Especies Ameazadas.
O Oribio é, ademáis, zona de presenza recente de oso pardo, dentro do proceso de expansión natural da especie polas serras orientais lucenses que leva producíndose desde hai uns anos.