Abre a tempada de alto risco de incendios: Galiza contará cun 21% menos de persoal de extinción nun verán que se prevé máis cálido
A tempada de alto risco de incendios comeza esta terza feira, 1 de xullo, e manterase até finais de setembro, nun verán que, segundo a Axencia Estatal de Meteoroloxía (Aemet), prevese "máis cálido do normal" na Galiza.
Un total de 7.000 profesionais estarán dispoñíbeis para combater o lume na época de alto risco, ademais dunha trintena de medios aéreos e 380 motobombas. En concreto, os medios aéreos mantéñense en 30 en época de alto risco. Serán 20 da Xunta (14 helicópteros e seis avións de carga en terra) e entre nove e dez aeronaves do Estado (cinco delas, avións).
O persoal da Xunta para medios aéreos segue en 112 traballadores para o alto risco que comeza o 1 de xullo (en 2024 houbo unha diminución desde os 124 que figuraban en 2023). En cambio, estes empregados no caso do Estado soben a 65 (eran 59 en 2024). O total global do persoal que se recolle no plan antincendios (Pladiga) é de 5.199 persoas para a campaña de verán –entre medios propios da Xunta, Estado e municipios–, o que se traduce en 21% que en 2024, xa que o global de entidades municipais locais diminúe de 1.995 en 2024 a 1.968 en 2025. Con todo, o Goberno galego garante a intervención dunhas 7.000 persoas entre diferentes administracións.
Durante o alto risco sumaranse ás tarefas de prevención e vixilancia nos montes galegos un total de 35 patrullas do Exército, cinco máis que o ano pasado que se centrarán na provincia de Ourense, a máis afectada polos lumes. Esta Operación Sentinela despregarase do 15 de agosto ao 30 de setembro de 2025.
O Pladiga para a campaña de 2025 tamén inclúe novidades como a creación da figura dun xefe de loxística en grandes incendios, o desenvolvemento dunha ferramenta de lumes transfronteirizos con Portugal e un aumento de recursos para formación. Este ano, ademais, tamén haberá tres equipos chegados de Países Baixos e Estonia que veñen a Galiza a colaborar e a aprender sobre o dispositivo.
Menos de 18.555 hectáreas
O Pladiga marca o obxectivo de que ardan menos de 18.554,5 hectáreas en 2025, a media do queimado na última década –15.106 hectáreas se se quitan os valores extremos destes 10 anos–. Ademais, increméntase a rede de videovixilancia a 181 cámaras, catro máis, en 90 localizacións, con dous sitios novos (nas Pontes –Eume– e Mondariz–Condado–).
Este plan ten obxectivos como unha redución dos 307 incendios de media na última década (lumes de máis de 0,5 hectáreas). En liña con anos anteriores, os fogos superiores a 25 hectáreas deberanse manter por baixo de 2% do total e prevese que os dunha hectárea ou menos supoñan máis de 70%. No tocante ás situacións 2, aquelas nas que o lume ameaza casas, quérese baixar das sete activacións medias do último lustro –houbo só una en 2024–.
As hectáreas queimadas en 2024 foron 2.644,7 –con mínimo histórico de 755 lumes– unhas 4.000 hectáreas menos que as 6.749 de 2023, cifra que só foi menor en 2018 (2.600). Sobresaen nestes dez anos o arrasado nas vagas de 2017 (62.096) e 2022 (51.643).
Así mesmo, o Pladiga marca obxectivos específicos para este ano como: unha revisión dos plans municipais de prevención de incendios pendentes de aprobación, desenvolver convenios para a constitución de brigadas de prevención en mancomunidades de municipios durante seis meses ao ano, avanzar no anteproxecto da lei pendente de loita integral contra incendios e comprar seis máquinas hidrostáticas polivalentes que poden facer tanto rozas como extinción. Ademais, o persoal laboral fixo descontinuo de prevención de incendios pasa a traballar oito meses ao ano este 2025 e aumentará a nove meses en 2026.
Parroquias de alto risco
As parroquias de alto risco de incendios, aquelas que acumulan unha media anual de sete lumes ou máis no último lustro, así como as que sufrisen dous incendios ou máis superiores ás 200 hectáreas nos últimos 10 anos, baixan a 26 este ano, o que supón 14 menos que as 40 de 2024.
En concreto, hai 16 parroquias que saen da listaxe en 2025: Ribasieira, no municipio de Porto do Son; Meiraos, en Folgoso do Courel; Castro de Escuadro, en Maceda; Padrenda, en municipio homónimo; Casaio, en Carballeda de Valdeorras; Queixa, en Chandrexa de Queixa; Cernado, en Manzaneda; A Xironda, en Cualedro; Camba, en Laza; Chaguazoso, na Mezquita; Bousés, en Oímbra; Grixoa, en Viana do Bolo; Sabuguido, en Vilariño de Conso; Vilamaior da Boullosa, en Baltar; Saiar, en Caldas de Reis; así como Poio, en concello homónimo. Pola contra, entran na lista de parroquias de alto risco: Requeixo, en Chandrexa de Queixa, e Pontellas, no Porriño.
Paralelamente, a Consellería do Medio Rural ten previsto levar a cabo durante 2025 un total de 250 queimas preventivas nunha superficie de 1.437 hectáreas, maior cifra histórica desde a posta en marcha desta medida para evitar incendios forestais.
