Avogacía do Estado presenta un recurso contra a prórroga de Ence e Rueda mostra o seu "desgusto"

A Avogacía do Estado vén de presentar un recurso promovendo incidente de nulidade contra a sentenza do Tribunal Supremo que avalou a continuidade da celulosa Ence na ría de Pontevedra.

Segundo se puido coñecer, esta iniciativa da Avogacía do Estado baséase en que en febreiro a Comisión Europea anunciou a apertura dun procedemento sancionador ao Goberno do Estado “por falta de transparencia nos mecanismos de adxudicación das concesións no dominio público marítimo-terrestre do litoral”.

Ante este recurso da Avogacía do Estado, o presidente da Xunta, Alfonso Rueda, trasladou o seu "desgusto" e "sorpresa".

"Levei un desgusto", recoñeceu o titular do Executivo galego, a preguntas dos empresarios nun coloquio organizado pola Confederación de Empresarios de Pontevedra en Vigo.

Rueda sinalou que está "sorprendido" porque a sentenza do Supremo "é bastante clara", e ironizou: "Gustaríame que a Avogacía do Estado fose igual de insistente noutros temas que vemos por aí".

O presidente da Xunta advertiu de que esta actuación do Estado "non é boa" porque a empresa "foi clara desde o principio" e alertou de que necesitaba "seguridade xurídica para seguir facendo investimentos".

Tras matizar que non pretendía facer de "defensor de Ence", o presidente galego apuntou que "chega un momento en que hai que dicir: xa se pronunciaron os tribunais, imos deixar que se siga producindo riqueza".

Así mesmo, criticou que se presentou este recurso "a un mes das eleccións locais", cando o Goberno do Concello de Pontevedra, presidido por Miguel Anxo Fernández Lores (BNG), "se implicou tanto" (o consistorio tamén recorreu a sentenza, do mesmo modo que Greenpeace). "Non me gusta nada, creo que estas cousas deben separarse e espero que non se volva a repetir", resolveu.