A Xunta toma a decisión de estender a prealerta de seca á totalidade da Demarcación Hidrográfica Galiza-Costa, como medida para extremar a vixilancia pola escaseza de precipitacións dos últimos meses. Porén, matiza que esa escaseza aínda non pon en risco o abastecemento de auga.
Así o destaca o Goberno galego após a reunión da Oficina Técnica da Seca, que decorreu nesta cuarta feira e na que se acordou a ampliación a todos os sistemas do norte da conca da situación de prealerta de seca.
Deste xeito, a totalidade da demarcación pasa a estar en prealerta por seca, declarada o pasado 7 de febreiro en doce dos dezanove sistemas do sur da demarcación.
Agora, esténdese aos sete do norte que permanecían en parámetros de normalidade: río Eume e ría de Ares; Ferrol; río Mera, ría de Santa Marta de Ortigueira e ría de Cedeira; río Sor, ría Santa Marta de Ortigueira e ría de Viveiro; río Landro e río Ouro; río Masma, e ría de Ribadeo.
Vixilancia da situación
Após un mes de marzo no que a media de precipitacións foi de 125 litros por metro cadrado, concentrados fundamentalmente nas primeiras dúas semanas, a Xunta di que a decisión busca extremar a vixilancia no seguimento dos indicadores.
Prestarase especial atención a aqueles ríos que presentan un comportamento paralelo á evolución das precipitacións, dado que as choivas do terceiro mes do ano non foron suficientes para recuperar a normalidade dos niveis freáticos que alimentan os cursos fluviais.
En definitiva, o Goberno galego subliña que o obxectivo é anticiparse con esta declaración a posíbeis problemas pola escaseza de auga, e apela á cidadanía para facer un uso responsábel dos recursos.
