As tres Alcaldías rotatorias que haberá neste mandato na Galiza, a falta das 13 corporacións que quedaron pendentes, están situadas na circunscrición de Ourense: Vilardevós, O Bolo e Ramirás.
Ramirás
En Ramirás, ademais, o acordo que deu pé á rotación comprometida de dous anos naceu por sorpresa, dado que PP e PSOE -que se afasta da directriz acordada por socialistas e nacionalistas a nivel galego de favorecer gobernos progresistas onde fose posíbel- aliáronse para impedir que gobernase o nacionalista Marcos Menéndez.
BNG, PSOE e PP empataron con tres edís en Ramirás o pasado 28-M, sendo os nacionalistas os que obtiveron máis papeletas, seguidos dos socialistas e dos populares.
Así, PSOE e PP pactaron un acordo rotatorio polo que a socialista Isabel Xil será alcaldesa os primeiros dous anos e os dous restantes será a quenda do popular Juan Carlos Rodríguez.
O Bolo
Tamén no Bolo se ratificou unha alcaldía rotatoria este sábado. O pacto neste caso produciuse entre PSOE e Somos O Bolo. O candidato socialista, Alberto Vázquez, foi investido e gobernará os dous primeiros anos. Os dous restantes ten o compromiso de pasar o bastón de mando a Miguel Ángel García.
Vilardevós
En Vilardevós, así mesmo, confirmouse o acordo que xa transcendera esta semana polo que o PP perde a Alcaldía despois de 12 anos.
A socialista Eva María Pérez Magote asumiu no pleno de investidura o bastón de mando. Terao os primeiros dous anos do mandato municipal que agora arrinca e Tamara Balboa, de Interior Galego Vivo, os dous seguintes.
Tres corporacións quedan sen constituír na circunscrición de Ourense (Carballeda de Valdeorras, Celanova e Castro Caldelas -neste caso, haberá que repetir eleccións-).