Rueda pon o Camiño de Santiago como exemplo de "turismo sostíbel e respectuoso"

Máis de 408.000 'compostelas' foron expedidas até o momento.
Alfonso Rueda interveu esta sexta feira no encontro de cidades 'Iacobus Mundi'. (Foto: Xunta)
photo_camera Alfonso Rueda interveu esta sexta feira no encontro de cidades 'Iacobus Mundi'. (Foto: Xunta)

O presidente da Xunta, Alfonso Rueda, reivindicou esta sexta feira o Camiño de Santiago como exemplo de turismo "respectuoso" co medio ambiente e coas tradicións dos territorios, municipios e cidades que percorre.

Fíxoo durante a inauguración do congreso internacional Iacobus Mundi: cidades e territorios xacobeos do mundo, que reúne no Hostal dos Reis Católicos (Compostela) representantes de diferentes lugares de todo o planeta vinculados cos roteiros xacobeos.

Neste contexto, Rueda relatou como os camiños que rematan ante a tumba do Apóstolo Santiago foron mudando ao longo dos séculos, mais non así o espírito do peregrino nin do propio Camiño, porque todo iso, ao seu entender, "mantense invariábel". "É froito de séculos facendo as cousas ben", engadiu posteriormente.

Así, o presidente galego insistiu en que o Camiño é "o principal exemplo de turismo sostíbel e respectuoso" co medio ambiente, mentres que os peregrinos son persoas que emprenden unha viaxe non só físico, senón tamén espiritual, "para enriquecerse" desde múltiples vertentes.

Rueda destacou a cifra récord de 'compostelas' repartidas este ano, máis de 408.000 até o momento, á vez que puxo o foco en que cada día seguen chegando a Santiago unha media de 2.000 peregrinos.

Con todo, precisou que o máis importante "non é o número" de visitantes, senón todo o que arrodea o 'fenómeno Xacobeo': "Importa facer as cousas ben e manter as esencias do Camiño mil anos despois".

Comentarios