"Rueda non aguanta que Ribeira teña un alcalde honesto": Pontón traslada o seu apoio a Luís Pérez
De prosperar a moción de censura, a nova alcaldesa da localidade do Barbanza será a popular Mariola Sampedro.
A portavoz nacional do BNG, Ana Pontón, trasladou o seu apoio ao alcalde de Ribeira (O Barbanza), Luís Pérez Barral, despois de que o PP e catro edís do Partido Barbanza Independente (PBBI) rexistraran unha moción de censura contra o rexedor nacionalista.
Nunha mensaxe nas súas redes sociais, a líder do BNG criticou o presidente da Xunta da Galiza e do PP na Galiza, Alfonso Rueda, por "non aguantar" que Ribeira teña un alcalde que goberna "para a maioría, honesto e cun proxecto que mellora a vida da xente".
Rueda non atura que Ribeira teña un alcalde que goberna para a maioría, honesto e cun proxecto que mellora a vida da xente.
— Ana Pontón (@anaponton) September 29, 2025
Todo o meu apoio para Luís Pérez, que tras máis de dous anos como alcalde, estou certa, hoxe ten o apoio da maioría da veciñanza.
Adiante alcalde! pic.twitter.com/vJrsy2DzAt
Así, aproveitou para mandar todo o seu apoio a Luís Pérez que, na súa opinión, tras máis de dous anos como rexedor, conta co "apoio da maioría da veciñanza".
De prosperar a moción, a nova alcaldesa da localidade do Barbanza será a popular Mariola Sampedro, que tomou o relevo de Manuel Ruiz Rivas, actualmente no Senado.
