O PP rexeita solicitar novas competencias para Galiza

Logo de que durante os 12 anos de Goberno de Alberto Núñez Feixoo non se lograra ningunha nova transferencia de competencias do Estado á Galiza, a Xunta considera agora que antes de pedir novos traspasos é preciso que o Estado financie aquelas coas que xa se conta. 

Así, conxelando de novo o desenvolvemento competencial do autogoberno galego, o vicepresidente primeiro da Xunta, Alfonso Rueda, dixo esta cuarta feira, 28 de abril, no Parlamento galego que a Galiza ten hoxe en día prioridades que reclamar ante o Goberno estatal. 

Referiuse así a cobranza da débeda do IVE do ano 2017, os compromisos pendentes coas infraestruturas, o apoio ao tecido industrial e produtivo e a mellora dos servizos públicos do Estado na Galiza.

Así respondeu ao deputado do BNG Luís Bará, que emprazou a reclamar as transferencias pendentes e criticou que o Executivo de Feixoo fora "incapaz" de conseguir "unha soa transferencia" fronte ás "14 do bipartito -do PSdeG en BNG- en catro anos -de 2005 a 2009-".

Ademais, cualificou de "fracaso, calamidade, desastre e pura incompetencia" a xestión dos 12 anos dos Gobernos de Feixoo. 

O PSdeG pide 30 traspasos

Na sesión plenaria, os votos en contra do PP impediron que saíse adiante unha proposición non de lei coa que o PSdeG volvía pedir que a Xunta reclamase 30 novas competencias que o viceportavoz socialista, Pablo  Arangüena, cualificou de "razoábeis, razoadas e perfectamente viábeis".

A iniciativa replicaba unha petición de transferencias que os socialistas presentaran hai dous anos para "avanzar no modelo autonómico" con base nun “federalismo dinámico” pedindo a xestión de materias como tráfico, inspección laboral, litoral, dominio público marítimo–terrestre ou a demarcación xudicial, entre outras.