O PP rexeita aumentar o investimento en Sanidade, actualmente á cola do Estado: 43 euros por habitante menos que a media

O conselleiro de Facenda, Miguel Corgos, defendeu esta segunda feira no Parlamento da Galiza as contas públicas do Goberno galego ligando á situación económica “a inestabilidade política que levou a conformar o Goberno máis débil de toda a historia da democracia”, dixo en relación á conformación do Executivo liderado por Pedro Sánchez. Ao tempo, rexeitou a redución da débeda pública do Executivo galego, acordada entre o BNG e PSOE no acordo de investidura de Sánchez, por considerala “un privilexio para unha parte e a consideración dos demais como un suxeito pasivo”. Así, aseverou que “é un traxe a medida para unha comunidade que non precisan as outras comunidades autónomas” e reclamou a convocatoria dunha reunión do Consello de Política Fiscal e Financeira. Orgullo no PP O portavoz do grupo parlamentario do PP, Alberto Pazos, manifestouse “orgulloso do traballo realizado polo Goberno galego” desde 2009 e cargou contra Ana Pontón, a líder do BNG, nunha intervención marcada polas vindeiras eleccións galegas. Nesta perspectiva, apuntou que Galiza “conseguiu os seus resultados sen asaltar os petos dos galegos e sen endebedarse como outras comunidades para financiar soños independentistas” e destacou “un orzamento para manter Galiza como illa de estabilidade no marco da tormenta que vive España”. "As últimas contas do PP" A portavoz nacional do BNG, Ana Pontón, explicou as contas públicas como “as últimas do PP” e propias “dun Goberno esgotado, incapaz de resolver os problemas das persoas e dar resposta ás necesidades do país”. Asegurou que os orzamentos “din que estamos diante dun Goberno que non defende a sanidade pública e desvía fondos á privada” e insistiu en que as contas “desenténdese dos servizos públicos”. Pontón puxo o foco no sector dos coidados, denunciando que a Xunta deixa “as residencias de maiores en mans dos fondos voitres”. Defendeu ademais “outra Galiza posíbel” coas alternativas do BNG, que pasan polo desenvolvemento dunha política fiscal que cumpra o principio básico de que pague máis quen máis ten (o que achegaría uns ingresos adicionais de 209,5 millóns, dixo) e a reorientación de 1.734 millóns do gasto. Así, entre as liñas do “goberno do cambio”, Pontón enunciou catro eixos relacionados co reforzo dos servizos públicos e as políticas de igualdade, o avance en dereitos e na solidariedade nun momento de crise, o desenvolvemento dun novo modelo produtivo e a preservación do territorio e a loita contra o cambio climático. Así, defendeu reforzar con 250 millóns a Atención Primaria, 55 millóns para atender os nenos e as nenas con necesidades educativas especiais ou 90 millóns para pór en marcha un novo modelo de residencias de xestión pública. Citou un pacto pola ciencia dotado de 300 millóns, ou un plan de vida digna, con 60 millóns, que permita recuperar a tarxeta básica de alimentos e medicinas e unha renda galega de inserción laboral. "Versión moderna do pan e circo" O voceiro parlamentario socialista, Luís Álvarez, presentou os orzamentos da Xunta como “unha colección de estímulos ao votante”. Cualificounos como “unha versión moderna de pan e circo” e lamentou que “este proxecto ten unha planificación deficiente, que non reflicte as necesidades da Galiza”. Álvarez denunciou que “non se abordan con acerto as necesidades sociais,para prestar con calidade os servizos públicos, como a sanidade ou a educación” e criticou que na proposta de orzamentos “non haxa medidas para reducir as desigualdades e as fendas sociais, porque aqueles colectivos vulnerábeis non teñen a resposta ás súas problemáticas". "Son uns orzamentos ineficientes para afrontar os problemas do sistema sanitario público por non ter capacidade de realizar as transformacións que os profesionais reclaman. Os orzamentos non van paliar as listas de espera", lamentou. A través da emenda aos orzamentos, o PSdeG propuxo esta segunda feira mobilizar 470 millóns até lograr os 13.700 millóns de gasto non financeiro e "mudar as prioridades da acción do Goberno, centrándoas no reforzo do Estado do benestar e na reactivación económica e industrial da Galiza". A CIG concéntrase ante o Parlamento para reclamar uns orzamentos "dignos" en sanidade e dependencia As protestas sanitarias O debate á totalidade dos orzamentos foi seguido desde fóra do hemiciclo por colectivos que protestaban en contra das contas públicas. Unha destas entidades, a CIG-Saúde, concentrou ducias de delegados e delegadas ás portas da Cámara galega para denunciar os recortes en materia sanitaria. Neste sentido, o responsábel da CIG-Saúde, Manuel Moreira, denunciou que “a Xunta fala de 1.500 millóns de orzamentos para Atención Primaria, pero os propios orzamentos recollen que deses, 800 millóns son para gasto farmacéutico, polo que só quedan 700 millóns para o gasto de Atención Primaria". A Galiza fica á cola do Estado en gasto en Primaria O incremento do investimento sanitario foi unhas das cuestións reclamadas con maior insistencia esta segunda feira polos grupos nacionalista e socialista nas súas respectivas emendas á totalidade. As partidas destinadas a sanidade representan 33,2% do total do orzamento galego para 2024 e medran 3,9%. Porén, o investimento sanitario sumou no actual exercicio 33,5% do conxunto das contas públicas, a inflación medrou 5,4% e os orzamentos creceron 5%. Nesta liña, as contas sanitarias soben para a próxima anualidade, por baixo do total do orzamento e do Índice de Prezos ao Consumo (IPC), o que implica unha caída das partidas de 1,5 puntos en relación a 2023. A Autoridade Independente de Responsabilidade Fiscal (Airef) ten sinalado, con datos da liquidación dos orzamentos de 2022, efectuada pola Intervención Xeral da Administración do Estado (Ixae), que o gasto sanitario por habitante na Galiza fechou en 1.727 euros en 2022, 43 euros por baixo da media estatal, fixado en 1.770 euros por habitante e só por diante de Madrid e Andalucía. A sanidade privada é a gran favorecida das contas públicas para 2024. Nesta dirección, os orzamentos do vindeiro exercicio dedican seis millóns de euros máis aos concertos con hospitais privados, a falta de concretar a contía destinada ao hospital vigués de Povisa, que recibe a cantidade máis elevada neste concepto.