Paula Prado (PP) volve trabucarse: quen provocou a caída do ciclista na Volta foi un garda civil
O final da 15ª etapa da Volta, con meta en Monforte de Lemos, rematou con 10 persoas detidas nas comarcas de Lugo e Terra de Lemos por manifestarse contra a presenza do equipo de Israel na competición ciclista. Foi a primeira xornada de protestas na Galiza tras as mobilizacións previas noutros puntos do Estado, durante a que se produciron cargas policiais contra os participantes propaslestinos en diferentes treitos da etapa.
As detencións efectuáronse por desorde pública "con perigo para a integridade das persoas", segundo trasladaron fontes coñecedoras das mesmas. Desta forma, oito leváronse a cabo no Corgo (comarca de Lugo) a cargo de axentes da Garda Civil e outras dúas foron realizadas en Monforte por efectivos da Policía española.
No paso da Volta polo Corgo, minutos antes das 16 horas, tivo lugar un episodio de tensión entre manifestantes e axentes da Garda Civil. Os participantes da protesta tentaron cortar a estrada e algúns deles foron reducidos polos axentes, tras o que se efectuaron un total de oito detencións.
Entre estas persoas arrestadas atópase un home que estivo involucrado noutro dos incidentes que se sucederon na xornada, e que todas as crónicas apuntan como responsábel da caída dun corredor, o ciclista do Movistar Team Javier Romo. Mais as imaxes aclaran os feitos e amosan como é un axente da Garda Civil o que se cruza por diante dos competidores e provoca en última instancia o desequilibrio e a caída de Romo
Como se puido ver na retransmisión, a 56 quilómetros do final, o manifestante acusado de causar a caída do ciclista e detido por este motivo, estaba situado entre árbores. Ao paso dos ciclistas correu na súa dirección e tropezou aos pés do pelotón, mais sen chegar a acceder á calzada e mesmo cando o participante que acabou no chan xa superara a súa posición. Foi entón cando un garda civil, que se dirixía cara a esta persoa, pasou polo medio do pelotón e provocou a caída de Javier Romo.
Todas as crónicas sinalaron o manifestante sen reparar nos feitos. Tamén a secretaria xeral do Partido Popular na Galiza, Paula Prado, quen no seu perfil de X acusou o manifestante propalestino cun vídeo de dous segundas que amosa a secuencia completa e que terxiversa o acontecido durante a 15ª etapa da Volta, sinalando, ademais, o BNG, cuxas formacións locais participaron nas protestas e cuxos membros figuran tamén entre as persoas detidas polas forzas de seguridade.
El BNG pretende que normalicemos que un espectador se esconda con una bandera palestina entre los matorrales, salga cuando vienen los ciclistas y acabe provocando una caída. Claro que sí, lo normal. pic.twitter.com/aiH23gdXDa
— 🍒 Paula Prado (@paulapra2) September 7, 2025
Após as primeiras detencións da xornada no concello do Corgo, rematada a etapa da Volta ciclista en Monforte, resultou detida a voceira municipal do BNG en Pantón e responsábel comarcal do BNG en Lemos, Rosana Prieto. Tras os arrestos, ao redor de 50 persoas concentráronse diante da Comandancia da Garda Civil de Lugo.
