Miles de persoas marchan en Compostela convocadas polo BNG no Día da Patria Galega
Miles de persoas procedentes de todas as comarcas galegas marcharon esta sexta feira en manifestación polas rúas de Compostela convocadas polo BNG nunha grande mobilización polo Día da Patria Galega baixo o lema 'Galiza Sempre, unha nación en marcha pola súa soberanía'. A manifestación partiu da Alameda da capital galega pasadas as 12 horas entre bandeiras, gaitas, bombos e consignas, e presidida por unha bandeira da Patria xigante.
Nunha sexta feira na que a calor vai aumentando co paso das horas, para alén de bandeiras galegas, este 25 de xullo destacaban xa desde primeira hora outras que tradicionalmente estaban presentes este día mais que hoxe teñan unha presenza e forza especial: as palestinas. Os berros de 'Galiza-Palestina, solidariedade' escoitábanse na marcha.
🥁 Así sonan as gaitas e os bombos na manifestación do BNG polo Día da Patria Galega
— Nós Diario (@NosDiario) July 25, 2025
👉 Máis info na ligazón: https://t.co/fbYUxyL3nm pic.twitter.com/azcIiJ7cwS
No arranque da manifestación, a portavoz nacional do BNG, Ana Pontón, apostou por "acoller no BNG todas as persoas que levan Galiza na cabeza e no corazón para ampliar o apoio social e electoral a un Bloque que quere ser a casa común de todos os galegos e as galegas".
✊ 'Quen queira, quen non, Galiza é unha nación'. Así berra a praza da Quintana na manifestación do Día da Patria Galega convocada polo BNG
— Nós Diario (@NosDiario) July 25, 2025
👉 Máis info na ligazón: https://t.co/fbYUxyL3nm pic.twitter.com/VVvq0IZKob
"Fronte a corrupción rampante do bipartidismo parasitario, un BNG que nunca tivo un condenado por corrupción e que serve ao país coas mans limpas", expresou a portavoz do BNG, que tamén chamou á "urxente tarefa de defender a paz, a igualdade entre os pobos e a democracia".
Xa chegada a manifestación a unha abarrotada praza da Quintana, Pontón proclamou neste Día da Patria que Galiza "é unha nación pola que merece a pena loitar", e por iso o BNG volveu congregarse "non só para conmemorar senón para renovar un compromiso, un vínculo e un latexo compartido polos que estiveron antes, os que están agora e os que virán". "Esta Patria vale a pena defendela", sentenciou.
🎵 Así soou o Himno da Galiza na praza da Quintana na manifestación do BNG polo Día da Patria Galega
— Nós Diario (@NosDiario) July 25, 2025
👉 Máis info na ligazón: https://t.co/fbYUxyL3nm pic.twitter.com/2DACkh0B2K
Cun BNG "no mellor momento da súa historia" e convencida de que "a sociedade galega iniciou un cambio que xa é imparábel", a líder nacionalista deixou claro que "a folla de ruta do Bloque pasa por chegar cada día a máis galegos e galegas".
🔵 Ana Pontón interveu na praza da Quintana no marco da manifestación do BNG polo Día da Patria Galega
— Nós Diario (@NosDiario) July 25, 2025
👉 Máis info na ligazón: https://t.co/fbYUxyL3nm pic.twitter.com/GOiX9hoFqV
"Co sorriso nos beizos e coa man tendida temos que acoller no BNG a todas as persoas que levan a Galiza na cabeza e no corazón, temos que ir transformando ese enorme amor ao país e esa esperanza nun futuro mellor en consciencia política e en apoio electoral. Ese é o noso labor primordial e o noso maior reto nestes intres históricos que vivimos", destacou na súa intervención.
