"Gobierno de rojos, época de piojos": Atacan a escultura do alcalde republicano de Arzúa asasinado polos franquistas
A maña deste domingo 26 de outubro apareceu con pintadas ofensivas a escultura que no concello da Arzúa (comarca homónima) lembra Juan Vidal, alcalde republicano da localidade asasinado polos fascistas en setembro de 1936.
As pintadas con mensaxes de extrema dereita e reaccionarias sucédense no municipio de Arzúa nas últimas semanas. Nesta ocasión, a vítima das mesmas foi Juan Vidal García, último alcalde republicano da localidade, fusilado polos fascistas en Compostela en setembro de 1936.
A escultura que no centro da localidade lembra esta vítima do franquismo apareceu na mañá deste domingo 26 de outubro cunha lenda que di "Gobierno de rojos, época de piojos".
O Goberno local de Arzúa emitiu un comunicado onde "manifesta o seu rexeitamento absoluto e a súa profunda preocupación polo acto vandálico cometido contra a escultura de Juan Vidal, alcalde de Arzúa fusilado polo fascismo no ano 1936".
"Ataque fascista"
O Executivo de Arzúa considera que se "trata dun ataque fascista en toda regra, unha agresión contra o noso patrimonio colectivo e contra a memoria democrática que representa a figura de Juan Vidal e outras persoas que foron represaliadas pola ditadura franquista no noso concello".
O Goberno municipal expresa o "o noso apoio e solidariedade coa familia de Juan Vidal e coa de todas as persoas represaliadas en Arzúa así como con todas as persoas que manteñen viva a memoria das vítimas da represión franquista".
A represión franquista foi moi dura no concello da Arzúa. No caso da familia de Juan Vidal afectou, tamén, a súa muller, Alicia Viaño, suspendida como mestra após o golpe de Estado de 1936 e desterrada á localidade de Astorga, na comarca da Maragatería.
"Arzúa non pode nin vai permanecer calada"
"Arzúa non pode nin vai permanecer calada ante actos que pretenden sementar o odio e borrar a nosa historia", avanzan desde o Goberno local, que considera as vítimas da ditadura como " símbolo do compromiso coa liberdade e coa xustiza social"
