O vicepresidente económico da Xunta da Galiza, Francisco Conde, lamentou o "golpe irreversíbel para Galiza" que supón, ao seu xuízo, a anulación da prórroga da concesión a Ence en Pontevedra, ante o que reclamou "alternativas" ao Goberno estatal.
É "un día triste", dixo, "consecuencia dunha decisión política, do PSOE e do BNG, que decidiron fechar unha empresa" como a pasteira Ence.
Así se referiu o vicepresidente segundo da Xunta á decisión da Audiencia Nacional de estimar o recurso contencioso-administrativo interposto polo Concello de Pontevedra e o de Greenpeace contra as resolucións do Goberno de Mariano Raxoi en funcións polas que se acordou prorrogar a concesión de Ence por un período de 60 anos.
Conde censurou que a situación de 500 familias sexa nestes momentos "de non retorno".
Neste sentido, cualificou a a anulación da prórroga de "golpe" para o sector forestal e loxístico, e engadiu que "dificilmente se pode avaliar" polo de agora o "impacto real" que terá esta decisión.
"Pedimos que o Goberno do PSOE apoiado polo BNG, que tomou esta decisión, poña encima da mesa as alternativas que poden atenuar o impacto dunha decisión que pon 500 familias nunha situación de futuro incerto e inxusto", exixiu.