28-M

O PP leva como candidato na Illa de Arousa un condenado por violencia machista

Matías González Cañón foi sentenciado en 2011 a 25 xornadas de traballos comunitarios e nove meses de afastamento da súa parella de entón por agredila en plena rúa, segundo avanzou 'elDiario.es'.
Matías González Cañón, nunha intervención durante un acto do Partido Popular de Pontevedra. (Foto: PP)
photo_camera Matías González Cañón, nunha intervención durante un acto do Partido Popular de Pontevedra. (Foto: PP)

A falta xa de menos dunha semana para que os galegos e galegas decidan o rumbo dos 313 concellos do país, o Partido Popular volve ficar no foco da polémica pola composición das súas candidaturas. Após coñecerse que o 'número 3' da lista conservadora nos Brancos (A Limia), José Manuel Barreiro, fora condenado por agredir o seu pai e ten aínda vixente unha orde de afastamento, o albo das críticas é agora o candidato á Alcaldía da Illa de Arousa (O Salnés).

Trátase de Matías González Cañón, elixido polos 'populares' para encabezar a súa candidatura nun municipio gobernado desde o seu nacemento polo Partido Socialista e quen, segundo informou esta segunda feira o xornal elDiario.es, ten un escuro pasado que agora o persegue de cara á vindeira cita coas urnas, este domingo 28 de maio.

González Cañón, quen traballa como vixilante de seguridade, foi condenado en 2011 por un delito de malos tratos contra a súa parella de entón, polo que foi obrigado polo xuíz a realizar traballos en beneficio da comunidade durante 25 días e a non comunicarse por ningunha vía coa vítima nos seguintes nove meses.

A denunciante acusouno no xuízo de discutir en plena rúa berrándolle e chegando a agredila fisicamente, golpeándoa na faciana. Por estes feitos a Fiscalía pedía inicialmente unha pena de dez meses de prisión.

Desde o Partido Popular alegaron descoñecer esta sentenza condenatoria e estudan agora "como actuar" contra González, segundo as mesmas fontes, se ben tampouco manifestan que pretendan substituír o seu candidato seis días antes das eleccións.

No caso do 'número 3' do PP nos Brancos, o presidente da Xunta e desta formación na Galiza, Alfonso Rueda, asegurou finalmente que, se Barreiro obtén acta de concelleiro após os comicios, non formará parte do Goberno local.

Négase a dimitir

O PP provincial de Pontevedra trasladou que, unha vez que transcendeu que Matías González Cañón fora condenado en 2011, exixiulle abandonar a candidatura, ao que este se negou. Nun comunicado, os 'populares' indican que pediron a González Cañón o abandono da lista por ter unha condena por uns feitos que "baten frontalmente cos principios do PP e do seu código ético".

En todo caso, apuntan que o abandono da candidatura é "unha decisión estritamente persoal" e que a condición de candidato, unha vez publicadas as listas electorais, "só pode perderse pola vontade do propio candidato", polo que o partido "non pode tomar unilateralmente esta decisión". Ao que si que se comprometen os 'populares' é a que González Cañón non pasará a integrar o seu grupo municipal na Illa.

Desde o PP sosteñen que "aborrecen e repudian" a violencia machista, e agregan que "unha persoa condenada por estes feitos non pode representar os valores deste partido". "Até o día de hoxe, o PP descoñecía a situación xudicial desta persona, condenada no ano 2011. Non existe un rexistro público de persoas condenadas nin de condenas, polo que non é posíbel comprobar os antecedentes de cada persona candidata, á marxe do que eles mesmos declaren", engadiron. Ademais, o PP esgrime que González Cañón non está afiliado ao partido, polo que non se lle poden aplicar os seus estatutos.

Comentarios