As deputadas e deputados do BNG mantiveron esta terza feira no Parlamento galego a primeira reunión do novo curso político con toda a "máquina engraxada" para dar resposta a un período de sesións marcado pola proximidade dos comicios autonómicos, unha "oportunidade histórica" que a forza nacionalista afronta co convencemento de liderar o cambio de rumbo que precisa a Galiza.
"O Bloque quere facer historia coa primeira presidenta da historia de Galiza, liderando un proxecto transformador no país. Para conseguilo, o grupo parlamentar ten xa a maquinaria engraxada", declarou o viceportavoz Luís Bará, quen anticipou un "intenso traballo" das deputadas e dos deputados do BNG para facer posíbel o cambio.
Axenda do cambio
Na súa primeira xuntanza, presidida pola portavoz, Ana Pontón, o grupo parlamentar avanzou a presentación de propostas "ambiciosas e transformadoras" para impulsar o autogoberno, a transformación tecnolóxica, o desenvolvemento industrial, o fortalecemento dos sectores produtivos ou a mellora dos servizos públicos esenciais, precisaron.
Piares, precisou a formación nun comunicado, dunha "axenda de cambio" na que xa están a traballar e que pasa tamén polas melloras na financiación da Galiza, un modelo fiscal máis xusto, un novo modelo enerxético ou medidas para a loita contra o cambio climático.
Primeiras iniciativas
Segundo explicou Bará, o Bloque vai presentar no inicio do curso político iniciativas centradas en combater a grave situación económica, sanitaria, social e ambiental.
Entre outras, defenderá propostas para axudar as familias galegas a afrontar o gastos do inicio do curso escolar "fronte á parálise e desidia que demostra nesta materia o Goberno do PP, absolutamente insensible ás dificultades que atravesan os galegos e as galegas", afirmou Bará.
Outro dos fitos do novo período de sesións, asegurou, será o Debate do Estado da Nación, no que o Bloque exporá a súa alternativa de goberno e para un novo modelo de desenvolvemento do país "fronte ao declive e o desastre das políticas do PP nos últimos anos".