O BNG achaca á "desastrosa" xestión do PP os problemas que afectan a sanidade pública de toda a Galiza este verán
Montse Prado critica que Sanidade intente normalizar esperas de dez ou quince días “como mínimo” para obter unha cita en Atención Primaria.
A deputada do BNG, Montse Prado, achacou á “desastrosa” xestión do PP na Xunta e á falta de planificación a “desfeita” na que se atopa a sanidade galega durante os meses de verán, con problemas en Atención Primaria e hospitalaria que afectan o conxunto do país, “de norte a sur e de este a leste”.
“Unha política sanitaria baseada na mentira permanente, en negar a realidade e en non pór ningunha solución só pode ter un resultado, que as galegas e os galegos non teñen garantida a asistencia sanitaria, nin a ordinaria nin a urxente”, advertiu a deputada nacionalista, quen emprazou o conselleiro Sanidade, Antonio Gómez Caamaño, a rectificar o seu “non plan” de verán e a pórse a traballar porque “o seu tempo de interino na Xunta xa pasou” e ten que exercer como máximo responsábel do Sergas, “non só como comentarista”.
Montse Prado convidou o conselleiro a percorrer os centros sanitarios do país e a escoitar profesionais e doentes para coñecer a “desfeita” que os 16 anos de política do PP están a facer na sanidade pública e os problemas que “con nome e apelidos” sofren os doentes da Galiza.
Falta de persoal médico e de ambulancias
Problemas como os que se están a dar nos centros de saúde en Viveiro (A Mariña), co seu cadro de persoal case reducido á metade; na Guarda (O Baixo Miño), onde hai que esperar até tres semanas para conseguir unha cita; en Cervo (A Mariña), onde están sen médico; ou en Vigo, con demoras tamén de 15 días. Tamén en Catoira (comarca de Caldas), cun só médico a media xornada e sen pediatra; Vilalba (A Terra Chá), con catro facultativos menos; Redondela (comarca de Vigo), con máis de dúas semanas para obter cita e máis dun mes para analíticas; Lalín (O Deza), sen atención á saúde mental desde hai tres meses; ou Fornelos ou Pazos de Borbén (comarca de Vigo), sen ningún médico.
Entre outros exemplos, referiuse ademais á ausencia de reforzos nos PAC, á falta de ambulancias ou á situación nos servizos de urxencias hospitalarias, como a do Hospital Álvaro Cunqueiro, con picos de máis de 600 doentes ao día.
“Non hai aumento de profesionais nin sequera nas zonas de máxima afluencia turística”, denunciou, para criticar que desde a Consellaría intenten “normalizar” que para obter consulta nun centro de saúde sexa necesario agardar dez ou quince días, dixo, negando a cifra de 6,5 días de espera media achegada polo conselleiro, que mesmo chegou a dicir que as demoras son máis altas do que lle gustarían.
“No BNG parécenos moi ben ter un conselleiro que fai de comentarista, pero é o responsábel da sanidade do país”, afirmou Prado para reclamarlle que rectifique co obxecto de garantir unha atención sanitaria digna aos galegos e as galegas, pondo recursos e "deixando atrás 16 anos dunha política que busca desmantelar o servizo público para beneficiar o negocio privado das empresas amigas do PP".
Menos recursos no verán
A portavoz de Sanidade do BNG cualificou ademais de “falso” o relato de que no verán fan falta menos recursos porque hai menos patoloxías. “É certo que hai patoloxías que son menos frecuentes nestes meses, pero aumentan outras, hai máis accidentes e hai outros problemas derivados do aumento de poboación”, manifestou Montse Prado. Diante dos argumentos da Consellaría para xustificar o recorte de camas hospitalarias —arredor de 750 este ano— aclarou que “as camas, por si soas, non atenden os doentes, é necesario persoal”.
Tampouco é certo, engadiu, que o problema sexa que non hai médicos porque, á marxe da responsabilidade que ten a Xunta na falta de facultativas e facultativos que contratar, “o certo é que tampouco están contratando outros profesionais necesarios en enfermaría, fisioterapia, matronas, Tcaes ou celadoras”.
“Os galegos e as galegas en xeral e os profesionais da sanidade pública teñen acendido o botón vermello do pánico diante da situación sanitaria”, denunciou, alertando de que, se ben os problemas agrávanse durante o verán, xa son tónica xeral ao longo de todo o ano. “A asistencia sanitaria estase prestando grazas ao sobre esforzo dos profesionais, con prolongacións de xornadas, intersubstitucións ou quendas a maiores”, sostivo Prado.
É por iso que esixiu unha rectificación na falta de planificación da Consellaría, á que reclamou ter operativos todos os recursos sanitarios (camas, quirófanos e probas diagnósticas) e contratar máis persoal, a comezar por aquelas categorías nas que si hai profesionais dispoñíbeis.
