Besteiro augura que o caso da AP-9 vai ser xudicializado "guste ou non guste"
O secretario xeral do PSdeG, José Ramón Gómez Besteiro, trasladou que augura que calquera resolución sobre o caso da autoestrada AP-9 terá un percorrido xudicial "guste ou non guste", contexto no que apostou por avanzar cara á gratuidade da infraestrutura.
Preguntado polos medios de comunicación acerca do estado da cuestión en vistas ao fin do prazo dado por Bruxelas para non levar a prórroga da concesión desta autoestrada ao Tribunal de Xustiza da Unión Europea (TXUE), Gómez Besteiro sinalou que o camiño está marcado ben porque se tome esa decisión de aceptar o ditame da Comisión Europea como o de interpor recurso ao mesmo.
Nesta liña, apuntou que a xudicialización tamén pode chegar pola propia empresa concesional. Todo iso despois de que en xullo a Comisión Europea enviase un ultimato ao Executivo estatal para que emende as irregularidades polas que foron prorrogadas as concesións das peaxes nas autoestradas AP-66 e AP-9.
A ollos de Bruxelas, as concesións de ambas as infraestruturas vulneran as regras da Unión Europea en materia de contratación pública e de concesión de autoestradas. Un asunto que, de non resolverse esta cuarta feira, os servizos comunitarios poderán elevar ao TXUE.
Durante a súa intervención, o secretario xeral do PSdeG denunciou a "incoherencia e mala fe" do PP. "Se estamos a falar do Partido Popular, falamos de José María Aznar, que co aplauso de Mariano Raxoi, de Alberto Núñez Feixoo e de Alfonso Rueda, impuxo peaxes altísimas e gravísimas ata o ano 2048", dixo.
Por iso, subliñou que manifestarse nese camiño cara á gratuidade é un "exercicio de sentido común e responsabilidade" e pide non "perder o ronsel" dese camiño que iniciou o PSOE e tivo que padecer tantos anos pola acción do Partido Popular.
