Ana Pontón propón máis de 50 medidas para evitar que se repitan as vagas de incendios e "dar futuro ao rural"

A portavoz nacional do BNG, Ana Pontón, presentou esta segunda feira en Ourense o plan integral 'Da Cinza á Vida' deseñado pola formación nacionalista para evitar que se repitan as vagas de incendios e "dar futuro ao medio rural". Pontón considerou que a vaga de lumes rexistrada este verán debe "ser un punto de inflexión" para cambiar de raíz as políticas forestais, ambientais e de desenvolvemento rural da Galiza fronte ao "modelo fracasado do PP".

"O que vimos non pode volver a repetirse e para impedir que poidamos ter novas vagas de incendios coma estas, temos que deixar atrás o modelo fracasado do Partido Popular", afirmou nunha comparecencia xunto a deputados e deputadas do BNG no Parlamento galego, na Deputación de Ourense e alcaldesas e alcaldes nacionalistas dalgúns dos concellos afectados polos lumes.

"Galiza merece moito máis que as mentiras e a propaganda coas que se quixo tapar a falta de prevención e a descoordinación dos dispositivos contra o lume, merece moito máis que o uso político partidista e carroñeiro que fixo o PP no medio dos peores incendios da nosa historia", criticou Pontón para apostar a continuación por un novo modelo forestal e de desenvolvemento rural.  

A portavoz nacional do BNG explicou na súa comparecencia as principais liñas de actuación propostas pola formación no plan 'Da Cinza á Vida', unha "proposta ambiciosa, realista, transformadora e comprometida co futuro do país" que inclúe máis de medio cento de medidas concretas que teñen como obxectivo "prestar atención inmediata ás persoas afectadas, afrontar unha recuperación ambiental real, cambiar a política forestal e desenvolver un novo modelo de monte, revitalizar o rural e pór en marcha unha política de prevención dos lumes estrutural e eficaz".

Prestar apoio inmediato ás persoas afectadas

Entre as medidas destinadas a prestar apoio inmediato ás persoas directamente afectadas polos lumes e á reconstrución das zonas queimadas, a líder nacionalista avogou por crear un plan de restauración hidrolóxico forestal e de control da erosión e un fondo de recuperación económico, social e ambiental por parte da Xunta da Galiza e do Estado, cunha dotación "mínima inicial" de 200 millóns de euros, ampliábel en función das necesidades que se detecten, e que vaia directamente ás zonas afectadas polo lume.

Así mesmo, considerou necesario incrementar até os 200.000 euros as axudas destinadas a recuperar as vivendas queimadas e avogou por artellar unha axuda directa e inmediata de 6.000 euros para persoas autónomas, Pemes e economía social que permita sufragar gastos de difícil xustificación e necesidades perentorias. Axudas todas elas que, recalcou, deben ter garantida a "burocracia cero". "Non marear a xente que sufriu estes lumes con papeleo innecesario e que estas axudas teñan unha resolución áxil", reclamou.

Novo modelo forestal e desenvolvemento rural

No apartado das medidas encamiñadas a alcanzar un novo modelo forestal e de desenvolvemento rural, considerou preciso mudar o actual modelo fracasado do PP e apostar por un monte produtivo porque, subliñou, un monte produtivo nun rural onde vive xente "é un monte que ten menos posibilidades de arder".

Nesta liña, debullou algunhas das medidas propostas polo BNG, como a "implantación da obriga de que a estrutura forestal sexa en mosaico, alternando especies de distinta combustibilidade con devasas e pasteiros, o que permitiría promover a biodiversidade e tamén como medida de seguridade, xa que ordenar así o territorio facilita a súa protección e favorece os labores de extinción".

"Trátase de apostar por que a forestación que se faga sexa con madeiras de calidade con esa estrutura en mosaico e onde deixemos atrás esas grandes masas de monocultivo de especies pirófitas que sabemos que son un grave problema cada vez que se producen un incendio", afondou.

De igual modo, avogou por unha aplicación efectiva dese principio de desenvolvemento multifuncional do monte, apostando por proxectos que incrementen os sistemas de pastoreo, a produción de madeiras de calidade para segundas transformacións e tamén o aproveitamento doutros produtos do monte.

En terceiro lugar, defendeu a implantación dunha moratoria a novas plantacións de eucalipto, unha especie pirófita que considerou "unha auténtica temeridade" continuar expandindo no territorio, o que significaría ademais ignorar o cambio climático e as súas consecuencias.

Co obxectivo de desenvolver un novo modelo forestal, avogou por último por recuperar as Uxfor (Unidades de Xestión Forestal) impulsadas desde o bipartito nos anos 2005-2009 e que contribuían a ordenar os espazos, crear zonas silvopastorís, devasas, faixas de protección e masas forestais ordenadas e descontinuas. "Permitiría acabar cunha parte do abandono do noso monte, que sexa produtivo e que ademais estea ben ordenado para evitar que os incendios sexan un problema para todos e todas", remarcou.

Protección das persoas e do territorio

Pontón tamén explicou algunhas das propostas do BNG para garantir unha protección efectiva das persoas, das súas vivendas e do seu territorio. Entre elas, apostou por duplicar os fondos destinados a prevención nos próximos dous anos e por crear un plan verde de emprego dotado con 50 millóns de euros para a contratación de traballadores e empresas locais que fagan labores de limpeza, xestión forestal, reforestación e proxectos de ordenación e xestión do territorio.

Por último, apelou a afrontar o debate sobre o funcionamento das faixas de protección a casas e a núcleos de poboación. "É evidente que hai que incrementar estas faixas de protección a 100 metros e que a Xunta debe crear un fondo extraordinario que permita executar esta medida porque unha lección que nos deixa esta vaga de lumes é que hai que pór medidas efectivas para protexer as persoas, as vivendas e o territorio", defendeu.

Estas son algunhas das principais medidas propostas polo BNG no plan 'Da Cinza á Vida' que Pontón considerou preciso someter a seguimento a través da creación dun comité galego de recuperación para os incendios, no que participen diferentes estamentos da sociedade galega, para garantir a súa execución e incorporar novas medidas no caso de ser preciso.

"Este plan nace do convencemento de que é posíbel reconstruír, protexer e transformar, nace da convicción de que hai outra política forestal posíbel e que debemos de tomar medidas que vaian á raíz dos problemas e que eviten unha nova catástrofe como a que acabamos de vivir este pasado mes de agosto", indicou fronte aos que pretenden responder con "silencio, resignación ou a rutina de promesas baleiras e propaganda".