69% de votantes CERA para as eleccións do 23 de xullo nunca viviron na Galiza

Até 2.671.176 persoas están chamadas a votar na Galiza nas eleccións estatais do 23 de xullo. Segundo os datos ofrecidos polo Instituto Nacional de Estatística (INE), 2.202.829 delas están incluídas no denominado Censo electoral de españois residentes en España (CER), que incorpora 910.740 electoras e electores na Coruña, 268.043 en Lugo, 252.141 en Ourense e 769.968 en Pontevedra. O corpo electoral complétase co continxente achegado polo coñecido como Censo electoral de españois residentes-ausentes que viven no estranxeiro (CERA), onde están inscritas aquelas cidadás e cidadáns de nacionalidade española pero residentes fóra do Estado. A lexislación estatal outórgalle o dereito a voto a este colectivo en todos os procesos electorais, excepto nos locais. Estes son os concellos galegos que non terán oposición neste mandato O número de votantes CERA na Galiza é de 470.375 persoas, sendo un número maior que o censo total da circunscrición de Lugo, integrado por 356.868 persoas entre os dous censos, e da de Ourense, composto por 354.969. Só a Arxentina, onde a emigración galega rematou nos anos finais da década dos 40 do século XX, conta con 164.168 residentes con dereito a sufraxio na Galiza, superando esta cifra a poboación de cidades como Ourense, Lugo, Compostela, Pontevedra ou Ferrol. 17,6% do corpo electoral As persoas inscritas no CERA con dereito ao voto na Galiza representan 17,6% do conxunto do corpo electoral galego. Asemade, esta porcentaxe non deixou de medrar nos últimos 30 anos, pasando de representar 4,6% en 1993, chegando en 2008 a 12,4% e incrementándose unha décima durante 2023. A maiores, o seu peso no país é moi superior ao do resto dos territorios do Estado, colocándose por detrás Asturias, con 12,7%, e Castela e León, con 8,1%, sendo, por conseguinte, onde máis influencia teñen no resultado electoral final os sufraxios dos denominados residentes ausentes. Finaliza o 28-M, estes son os resultados nas catro Deputacións galegas As persoas votantes do CERA superan a media galega nas circunscricións de Lugo e Ourense. Así, no primeiro caso suman 68.887 electoras e electores, o que representa 20,4%, situándose só por detrás da cidade en volume total de sufraxios. Unha situación análoga xérase en Ourense, onde o censo de residentes de ausentes está formado por 102.155 persoas, o que significa 28,7% do corpo electoral total. Nestas dúas circunscricións o aporte máis numeroso a este censo procede da Arxentina e Cuba, que recibiu as últimas remesas de emigrantes galegos hai 100 anos. A Arxentina, Cuba, o Brasil e Uruguai suman máis da metade das electoras e electores do censo de residentes ausentes. Nestes catro Estados, atópanse 289.206 persoas con dereito a voto nas circunscricións galegas para as eleccións de 23 de xullo: 164.168 na Arxentina, 47.070 en Cuba, 44.527 no Brasil e 33.765 en Uruguai. Neste sentido, o groso de inscritos no CERA vive no continente americano, sumando en toda esta área 357.476 persoas. Este continxente correspóndense co de menor vinculación coa Galiza por motivos xeracionais. Só 145.842 integrantes do CERA, isto é, 31% do total, naceron na Galiza, concentrándose a porcentaxe máis importante destes últimos en Europa, que agrupa a emigración máis recente. Precisamente, no continente europeo é Suíza o Estado con máis residentes de orixe galega, tendo o seu enderezo na confederación helvética 33.765 persoas. A continuación, figura Francia con 17.215 e Alemaña con 15.910. Un voto decisivo Especialistas consultados por Nós Diario destacan a importancia deste continxente de voto nos procesos electorais. A este respecto, o profesor da Facultade de Ciencias Políticas Miguel Anxo Bastos sinala que “a influencia destes votos varía en función do axustado que estea o proceso”. Nesta liña, apunta que “a súa incidencia é maior nas eleccións galegas que nas estatais” e asegura que “sempre beneficiou a forza política que controla o Goberno do Estado”. Asemade, entende que “as garantías de transparencia e limpeza do voto non son as mesmas alí que aquí”. O PP perdería a Xunta da Galiza cos resultados das municipais do 28-M O politólogo Manuel Anxo Fernández Baz non ten dúbida da influencia do CERA nos resultados electorais “porque se trata dun continxente de sufraxios moi elevado, até o punto de que en circunscricións como Ourense representa 3 de cada 10 votos. Mesmo noutras circunscricións do Estado, onde o seu peso no censo é inferior, ten chegado a mudar o reparto de escanos”. A maiores, incide en que “a supresión do voto rogado vai aumentar a participación”. Tres de cada 10 en Ourense Fernández Baz explica que “os sufraxios do CERA sempre resultaron menos decisivos nos procesos estatais que nos galegos, porque é menor o número de escanos que entran en reparto”. Malia isto, lembra que “cun reparto de 8 escanos pola Coruña, 4 por Lugo, 4 por Ourense e 7 por Pontevedra como acontece nas estatais, a entrada dese número de votos pode incidir na asignación dos últimos escanos, porque só coa participación de 10% de residentes ausentes, estamos falando de 47.000 votos no país que poden chegar a superar 10.000 votos en circunscricións como Ourense”. Non é casualidade que sexa neste distrito onde máis veces ten mudado a representación electoral pola achega dos sufraxios do CERA, desde os comicios galegos de 1989. A Arxentina, Cuba, o Brasil e Uruguai suman 61,4% do total do censo CERA Distribución de votantes CERA por Estados de residencia e circunscrición en abril de 2023 (Foto: Nós Diario). O 21 de setembro de 2022 as Cortes do Estado aprobaron, definitivamente, suprimir o voto rogado para residentes ausentes, isto é, aquelas cidadás e cidadáns que viven fóra do Estado español pero dispoñen desa nacionalidade. A nova lexislación electoral significa volver á normativa vixente até 2011, obxecto durante moitos anos de múltiples críticas polas súas irregularidades e falta de garantías. A este respecto, a propia Xunta da Galiza recoñeceu en 2007 que 30% de galegas e galegos estaban inscritos de maneira irregular no Censo de Residentes Ausentes (CERA), descoñecéndose os criterios seguidos para conformar o actual. O BNG pode lograr a Alcaldía en máis dunha trintena de concellos O acontecido no proceso electoral das elección autonómicas en territorios como Asturias co voto do CERA volve pór sobre sospeita este mecanismo pola súa falla de garantías. Precisamente, nesta comunidade recóntanse hoxe os sufraxios dese censo, descoñecéndose ao feche de edición o número de sufraxios emitidos, o que evidencia a ausencia de control previo. Fernández Baz asegura que “non hai garantía ningunha con este procedemento se non podes controlar o voto en orixe e cando non está garantida a identificación das persoas que votaron”. Neste sentido, advirte da “distorsión entre os votos da Galiza e os procedentes do exterior”, apunta que “este mecanismo de participación para os cidadáns do estranxeiro non é normal na lexislación doutros Estados” e denuncia “a ausencia de mecanismos de control para garantir un proceso transparente e sen dúbidas”.