Onde escoitar jazz?

Se hai un consenso no mundo do jazz entre afeccionados, estudosos, diletantes e novos curiosos, é que é moito máis interesante ao vivo que enlatado nun disco. Moi habitual despois dalgún concerto é escoitar alguén dicir que non lle gusta o jazz mais que o concerto en cuestión si que lle gustou. Algo é algo. O jazz é improvisación, é vivir o momento e crear a tempo real. Polo tanto, non é de estrañar que estar presente nese preciso momento sexa algo especial. Dalgún xeito, o espectador forma parte do proceso creativo ou, polo menos, da enerxía dese intre. Na Galiza temos sitios marabillosos nos que poder atender concertos de jazz: A Coruña: “Jazz Filloa”: desde 1980, máis de 40 anos en activo! Un templo para músicos e apaixonados do jazz. Os músicos de fóra que pasan polo local non poden evitar a sorpresa ao ver unha sala de apenas 50 metros cadrados. Cunha acústica perfecta para tocar desenchufado ten acollido figuras internacionais coma: Lou Bennett, Joe Henderson, Wynton Marsalis, Joe Lovano ou Avishai Cohen. “Garufa Club”: Probabelmente a mellor sala do país. Se o Filloa é perfecto para tocar desenchufado, o Garufa ten unha acústica excepcional para tocar amplificado. Cunha capacidade de 310 persoas pode albergar todo tipo de eventos mais sempre hai espazo para o jazz. Santiago de Compostela: “Borriquita de Belém”: máis de 50 anos activo converten esta sala nunha das primeiras de Galiza. Na liña do Filloa, trátase dun local moi pequeno e agradábel cunha estética e acústica excepcionais. Apoiando a escena local e nacional é unha cita ineludíbel para os amantes do jazz e da música en xeral. “Casa das Crechas”: Desde 1987 esta emblemática sala conta cun percorrido de moitos anos na defensa da cultura do país, apostando por numerosos concertos ao longo do ano e tres residencias: “A Foliada” (música tradicional galega) dos mércores, “Sumrrá” (jazz) nos domingos, e a “Compostela Swing e Jazz Manouche Jam Session” que é a jam de referencia do país neste estilo e que xa é coñecida internacionalmente. Lugo: “Club Clavicémbalo”: con máis de 30 anos en activo, hoxe en día alberga músicas moi variadas. Acolle gran parte da programación do “Festival de Jazz de Lugo” e polo seu palco teñen pasado algúns dos valores máis importantes da escena internacional. Ourense: “Café Latino”: por esta sala teñen pasado algunhas das figuras máis salientábeis e incluso históricas do jazz internacional, nomeadamente Ron Carter, Ray Brown, Benny Golson, Hank Jones, Mark Whitfield, Russell Malone, John Scofield, Mike Stern, Jorge Pardo, Roy Hargrove, e un longo etc. Pouco máis que engadir… Vigo: “La Casa de Arriba”: pensado nun primeiro momento para acoller pop e indie recibe cada semana unha jam session que alberga músicos de jazz locais -e, ás veces, internacionais- recoñecidos e principiantes. Non podíamos rematar este texto sen lembrarnos da persoa que máis fixo polo jazz en Vigo: Gonzalo Villar, falecido no 2017. Quen, xunto a Justo Pérez, fundou “La Negra Tomasa”, “El Malecón”, “Manteca” e, por último, o “Xancara Jazz”. Programador moi querido por todos os músicos, aos que sempre tratou do mellor xeito posíbel. A Gonzalo queremos dedicarlle este artigo.