As novas músicas que veñen do Brasil

Sinto ultimamente que nada me fascina, ou que ningunha música me pega no peito tan forte como para deter o meu paso pola rúa. Quixera outra vez atopar esa alegría pura que dá escoitar algo verdadeiramente orixinal… ou será que a medida que os anos pasan, a capacidade de asombro se vai esgotando? Será que cada vez somos menos "sorprendíbeis"? Desde aquela vez que escoitei a Silvana Estrada por primeira vez, creo que non voltei a asombrarme da novidade… Por iso, convén non acostumarse ao de sempre, convén saír do camiño habitual e escoitar outras formas de falar e convén, sobre todo, deixar de adular a mediocridade. Nesta temporada, cambiei de localización habitual e as miñas buscan parten agora desde o Brasil. Recentemente, atopei a música dunha banda chamada Bala Desejo, formada polas cantoras e compositoras Dora Morelenbaum, Julia Mestre, Lucas Nunes (membro da Dônica e produtor de Caetano Veloso) e Zé Ibarra (Dônica e membro da banda de Milton Nascimento). Bala Desejo é unha mestura de moitos ingredientes: bossa-nova, indie pop, tropicalismo… e en 2022 lanzaron o seu primeiro álbum de estudio Sim sim sim. Hai que dicir que todas as integrantes de Bala Desejo tiñan o seu camiño en solitario ata que chegou a pandemia, e comezaron a traballar na idea da reunión para un concerto en directo, ante a imposibilidade de levalo a cabo, decidiron finalmente gravar este LP. Este disco, dividido en "lado A" e "lado B" está pensado para desfrutar de dúas experiencias distintas. Cabe destacar os cortes "Passarinha" e "Nana del caballo grande" baseada nun texto de Lorca. Sim sim sim bebe con todo corazón dun océano de sons, estilos e estéticas. Recorda moito ao movemento Tropicália do Brasil dos anos 60, no que destacan figuras como Caetano Veloso, Jorge Ben, Gilberto Gil e Rita Lee, entre outros, pero tamén contén algo da psicodelia dos 70. O álbum é como unha continuación destes movementos máis que unha homenaxe ou unha imitación. Bala Desejo está orientado ao futuro, xa que parte do mesmo punto no que se detiveron aquelas iconas progresistas anteriores. Dicir que Sim Sim Sim é como un sopro de aire fresco do océano no panorama musical actual do Brasil sería inxusto para os contemporáneos de Bala Desejo (a música pop brasileira e o MPB están a facelo moi ben). Pola contra, a música de Bala Desejo é como un vento familiar que sopra suave, pero con firmeza, como un canto de alegría cantado arredor dunha vela que corre o risco de ser soprada. Se cambiamos a pregunta de… "É innovador o álbum Sim Sim Sim?… a Sim Sim Sim é un dos proxectos máis fermosos dos últimos anos?", a resposta sería: sim, sim, sim!