Jazz de Ría 2024

Jazz de Ría é un festival de jazz que decorre na Costa Ártabra, abarcando diversos concellos marítimos das comarcas de Ortegal e Ferrolterra. A programación combina jazz galego con proxectos destacados do ámbito estatal fomentando a colaboración con artistas e festivais doutros lugares. As actividades son abertas, gratuítas e accesíbeis, e buscan integrar o festival no territorio e implicar a veciñanza. O Jazz de Ría non se limita aos concertos, tamén ofrece unha variedade de actividades que permiten aos asistentes mergullarse no mundo do jazz. Este ano, un obradoiro de instrumentos de refugallo, aula aberta de baile swing, aula aberta de palmas flamencas e o roteiro “Balcóns ao Atlántico”. O festival terá lugar do 16 ao 20 de agosto en Narón, Neda, Cedeira e Valdoviño (comarca de Ferrolterra). Programación: 16 de agosto (Narón): O festival comeza fortísimo coa presenza de Marco Mezquida, un dos pianistas e compositores máis recoñecidos pola súa versatilidade e creatividade no ámbito do jazz contemporáneo. A súa traxectoria destaca pola combinación de estilos que van desde o jazz tradicional até a música clásica e as influencias mediterráneas. 17 de agosto (Narón): Magalí Saré e Manel Fortiá, un dúo catalán que fusiona jazz e música tradicional, destacándose pola súa interpretación vocal e instrumental. Conxugan creatividade e emotividade, creando un son único e envolvente. Pablo Sanmamed Trío + Benxamín Otero, proxecto gañador deste ano do Martín Códax. Sanmamed é un dos músicos máis completos e eclécticos do país. Baixo, contrabaixo, composición, arranxos… Acumula nove premios á súa traxectoria. Alba Careta Group, presenta Teia, o seu terceiro disco, unha compilación de composicións inspiradas nas súas propias vivencias acompañadas tamén de dúas versións da nova cançó. Chega a Narón cun directo explosivo, enérxico e orgánico formado polos mellores músicos da escena jazzística catalá actual. 18 de agosto (Neda): Antía Muíño, cubrindo outros estilos alén do jazz chega esta artista revelación da nova canción galega. 19 de agosto (Cedeira): Le Barluthier, abrirán a programación co seu “pianobar itinerante” para dar paso a outro dos pratos fortes do festival: Cuarteto Federal, catro músicos convocados desde a periferia -xeográfica e estilística- que exploran, desde o jazz de vangarda, tanto os lugares comúns como as diversidades territoriais. 20 de agosto (Valdoviño): Leticia Rey, esta artista de delicada voz que explora músicas desde o jazz até o indie será a encargada de fechar o festival. Nun contexto crecente de globalización, o festival Jazz de Ría sobresae pola súa habilidade para manter e impulsar a identidade cultural local, á vez que se entrelaza coas tendencias musicais globais. Este equilibrio entre o local e o internacional, o tradicional e o contemporáneo, converte o Jazz de Ría nunha experiencia singular e enriquecedora tanto para os artistas como para o público.