Os 10 anos de traxectoria de MJ

P rimeiro quero, desde este oco que me emprestan en Sermos Galiza, falarvos da beleza, da beleza e da tremenda paz que é escoitar cancións novas, pequenas ou grandes, e polas que quedas automaticamente "secuestrada". Non me pasa habitualmente, pero é algo que creo que todas deberíamos vivir a miúdo. Esta semana estiven "secuestrada" por varias pezas musicais, se tedes un anaco ao mellor podemos probar a ver se sorte o mesmo efecto en vós, xa sabedes que me encantan os experimentos musicais. Primeiro hai que empezar polo concerto nº 5 para clave BWV 1056 de Bach, o movemento "Largo", (hai tamén unha versión vocal, magnífica). Seguindo co experimento, falar tamén do novo vídeo do artista portorriqueño Residente, tremendamente emocional e coa colaboración da sempre impecábel Silvia Pérez Cruz. A canción en cuestión leva o nome de "313", pero reitero, de novo, que o fundamental é visionar o videoclip (ás veces, a música entra polos ollos). O outro día tiven o pracer de compartir escenario en Lugo e polo Día de Rosalía coa MJ Pérez, unha auténtica loitadora e activista do panorama musical galego. MJ Pérez está de celebración xa que fai dez anos de traxectoria. Esta cantautora galega percorreu un longo camiño, desde os seus primeiros inicios no rock-pop até o seu último disco, onde se apodera de sons latinos e raíces musicais. Con case 200 concertos en Galiza e Portugal, catro discos de produción propia, como Ollos que non ven, síntoma de cegueira e A Luz Prendida, amosan o seu incríbel talento e versatilidade. Ademais, as súas colaboracións con outros artistas dan ese toque especial á súa música, abrindo fronteiras para a irmandade con Portugal, como fixo con Ora aperta, amor. Pero falamos aquí do seu último sinxelo, "Barco á deriva", que presentou estes días e que está acompañado dun vídeo dunha feitura fermosa (porque, ás veces, a música entra polos ollos). Xa vedes que non se estila tanto presentar discos senón estrear sinxelos aos poucos, para ir abrindo boca. De "Barco á deriva" podemos dicir que, desde os primeiros acordes, introdúcenos nunha atmosfera nostálxica e reflexiva. A voz única de MJ Pérez guía a canción cunha emotividade palpábel, mentres que os arranxos musicais engaden profundidade e textura á experiencia auditiva. Coa súa poderosa combinación de letras profundas e melodías cativadoras consegue sempre mergullarnos nesa escuridade aparente, e así convocarnos a buscar o noso camiño nun mundo que cambia cada vez máis rápido. Así que desde aquí, celebramos as mulleres músicas e autoproducidas, tamén aquelas que loitan por conseguir un lugar propio. Por outros dez máis, MJ!