Unha gala para levar alegría ao pobo palestino asediado

Mago Teto, Camilo Franco, Sergio Pazos, Najla Shami, Luís Iglesia e Xabier Deive, Evaristo Calvo e Mónica de Nut serán os artistas que participen na gala que será presentada pola compañía oficial do Festiclown 'Os Sete Magníficos máis Un- e terá lugar o xoves ás 21 horas no salón de actos do hotel Araguaney. A gala foi presentada por representantes de Pallasos en Rebeldía, Festiclown, BDS Galiza ademais do Mago Teto e Camilo Franco, dous dos artistas convidados. A gala solidaria en favor do Festiclown Palestina celebrarase esta  quinta feira no salón de actos do Hotel Araguaney. As entradas están xa á venda na Libraría Couceiro, chamando ao 981582836 ou escribindo a [email protected]. Pódese tamén colaborar coa iniciativa iniciativa a través desta páxina de microfinanciamento http://www.verkami.com/projects/7435-festiclown-palestina-en-el-libano-2014 con aportacións económicas de apoio ao Festiclown Palestina. 

En xaneiro, unha equipa de Pallasos en Rebeldía viaxará ao Líbano e desenvolverá o segundo Festiclown en catro campos de refuxiados palestinos. “Achegarémonos á xente que está desprazada en campos e o noso obxectivo é que a risa e a arte que se fai en torno ao circo, á música e ao clown chegue en forma de caravana. Queremos canalizar a sensibilidade pola xente que está a sufrir e levarlle ánimo coa nosa risa”, comenta Manuel Roxo, de Pallasos en Rebeldía. 

En 2011, o Festiclown Palestina desenvolveuse en territorios ocupados mais as dificultades son moitas e xa daquela o director do festival, Iván Prado, fora expulsado e puxera en perigo o desenvolvemento da acción. “Chegar a eses territorios con estruturas de aéreos, poño por caso, convértese nunha odisea, cun desgaste inmenso. Nos campos de refuxiados temos persoas que nos están a facilitar a xestión”, explica sobre unha das razón de ir, desta volta, aos campos. De todas maneiras, o balance da primeira edición na que 40 persoas se desprazaron a territorios ocupados para ofrecer o seu espectáculo ao pobo palestino é, ao seu ver, “extraordinario e emocionante”. “Foi un grande éxito para nós e agora repetimos nos campos porque alí tamén atopamos a necesidade básica de rir”, sinala Roxo. 

Mil brazos que abrazan

“O Festiclown ten que continuar e cremos nel como nun colectivo do que saen mil brazos de xente”, sinala o organizador, que conta con que a gala sexa anticipo da solidariedade e o apoio cunha proposta que se financia coa vontade da organización e mesmo co peto dos propios artistas. 

“A situación que se vive alá é moi dura, inhumana, e non podemos darlle a espalda. Goliath pisotea a David cada día e desde hai moitos anos. Os campos son zonas asediadas, empobrecidas, coas necesidades básicas sen cubrir, que devecen porque chegue unha troupe de tolos cos seus coloríns e a súa alegría. Precisan da forza e a enerxía que ten o circo”, anota Manuel Roxo, aínda lembrando a cálida acollida de 2011.

Ghaleb Jaber Ibrahim, presidente da Fundación Araguaney, afirmou na presentación da gala  que a situación actual de Palestina precisa da atención internacional e defendeu “a importancia de que non se esqueza o conflito”.  Camilo Franco, un dos creadores que van estar na gala, defendeu o riso como arma de transformación ao igual que Mago Teto, convencido da relevancia que ten que unha delegación de pallasos leven a alegría aos campos de refuxiados. 

Por BDS Galiza, Elvira Souto sinalou que proxectos como Festiclown “son tan eficaces e necesarios”, non só pola propia experiencia co pobo palestino senón tamén polo traballo de concienciación que se desenvolve arredor da súa causa, na que se atopa tamén a campaña desenvolvida pola súa organización.