Os fabricantes de coches chineses comezan a destacar en Europa

O mercado europeo foi testemuña o pasado ano do contundente avance das marcas de automóbiles chinesas, lideradas por MG, que dominou con claridade a clasificación recollida nun informe elaborado por JATO Dynamics. O modelo deste fabricante ZS converteuse no automóbil chinés máis vendido en Europa, con 97.901 unidades matriculadas. Esta marca, anteriormente británica, colocou ademais tres modelos máis —HS, MG4 e MG3— entre os cinco primeiros, o que suma un total de 243.400 unidades vendidas. Esta cifra multiplica por case cinco as 50.300 unidades alcanzadas por BYD, o seu competidor máis próximo. Así e todo, BYD mostra un avance sostido grazas á súa estratexia centrada na electrificación, e logra colocar tres modelos entre os doce máis vendidos. Zeekr, con 30.500 unidades, e DR, con 18.600, ocupan a terceira e cuarta posición, respectivamente. Esta marca está en plena suba este ano no mercado do vello continente, e agárdanse grandes resultados de vendas a finais de 2025. No ano 2024 destacou especialmente o debut de Omoda, que irrompeu con forza ao alcanzar a quinta posición global con 14.300 unidades vendidas. O seu modelo estrela, o Omoda 5, foi o sétimo máis vendido do ano entre as marcas chinesas. Tamén sorprendeu a súa irmá, Jaecoo, que ingresou no Top 10 a pesar de aterrar en Europa nos últimos meses do ano. Unha situación parecida dáse co construtor Xpeng, que obtivo unhas cifras notábeis a pesar dunha presenza parcial no mercado europeo. En canto aos modelos, todos os incluídos na clasificación contan con versións eléctricas ou híbridas enchufábeis. Xunto ao dominio de MG, resalta a destacada actuación do Volvo EX30 —segundo absoluto con 79.023 unidades e primeiro 100% eléctrico da listaxe— e o Volvo EC40, que fecha o TOP 10. BYD, pola súa banda, conseguiu repartir de maneira equilibrada as súas vendas entre diferentes modelos, consolidando a súa presenza no vello continente.