Accesibilidade, estilo e moito carisma

O Opel Frontera Electric dá un paso máis coa chegada da versión Extended Range, equipada cunha batería de 54 kWh que lle permite alcanzar até 408 quilómetros de autonomía WLTP, é dicir, uns 100 adicionais fronte á versión estándar. Este novo modelo, dispoñíbel no acabado Edition desde 27.000 euros (IVE incluído), reforza a aposta da marca por unha mobilidade accesíbel e libre de emisións. Co Frontera Electric, o usuario pode afrontar tanto o día a día urbano como desprazamentos máis longos con total confianza. A recarga é sinxela: só precisa unha media hora nun punto de carga rápida de 100 kW para pasar dun 20 ao 80% da batería. Así, a oferta elévase a dúas opcións de batería (44 kWh con 305 km ou 54 kWh con 408 km), ademais de dúas variantes híbridas, sempre con acabados Edition ou GS. Este modelo mantén as súas claves: amplo interior, até 1.600 litros de capacidade de carga, segunda fila moi espazosa e detalles intelixentes como estación para smartphone, cargador sen cables opcional ou os exclusivos asentos Intelli-Seats. Ademais, con Electric All In, Opel inclúe servizos como a eProWallbox Move para cargar na casa, funcións de rutas electrónicas, oito anos de asistencia en estrada e garantía de batería. Macbor Rockster e Rockster Flat 125 EVO Estas dúas motos chegan con melloras que reforzan a súa condición de supervendas desde 2017. Tras a completa renovación de 2023, regresan agora cun motor máis potente e unha freada máis segura. Concibidas en Barcelona baixo a filosofía de "deseño con propósito", as súas liñas transmiten identidade, funcionalidade e estilo, converténdose en auténticas embaixadoras do espírito custom de Macbor. O motor monocilíndrico de 125 cc ofrece 9 kw (12,2 cv), un 28% máis que a versión anterior, con culata de 4 válvulas e 9,9 Nm de par. Suavidade e fiabilidade marcan unha condución óptima en cidade e estrada. Na parte ciclo, destacan a pinza telescópica de 37 mm e o dobre amortecedor traseiro, que garanten estabilidade e confort. O ABS de dobre canle, xunto a discos de 267 e 240 mm, melloran a seguridade destas versións. Abarth 600e, viva a electricidade! O Abarth 600e combina o espírito deportivo da marca coa mobilidade eléctrica máis avanzada. Dispoñíbel con 240 e 280 cabalos, ofrece aceleracións fulgurantes, chasis áxil e 3 modos de condución (Turismo, Scorpion Street e Scorpion Track). Equipado con asistentes de seguridade como control de cruceiro adaptativo, freada autónoma de urxencia, alerta de fatiga e detección de cambio de carril, asegura un plus de seguridade. A súa edición de lanzamento Scorpionissima engade cámara 360°, sensores de estacionamento, monitor de ángulo morto e Lane Position Assistant. O infoentretemento, con pantalla de 10,25", inclúe funcións de telemetría inspiradas na Fórmula E e compatibilidade con intelixencia artificial. Ademais, permite activar un xerador de son que recrea o icónico ruxido Abarth. En definitiva, un SUV compacto eléctrico que xunta deportividade e carisma.