A Eira de Xoana e Adega organizan o 28 de setembro un acto de lembranza e homenaxe a Leopoldo López Rego, focense que combinou as súas crenzas cristiáns coa militancia no nacionalismo e un compromiso coas clases populares, nomeadamente cos labregos, aos que como avogado de Comisións Labregas defendeu en múltiples conflitos e loitas.
A Eira de Xoana acolle este acto de lembranza. Ás 14:00 horas haberá un xantar de convivio que, ás 17:00, dará paso á homenaxe. Constará de exposicións de fotografías, vídeos e diferente material sobre a vida e o compromiso de López Rego. Ademais, repartirase entre @s asistentes unha sinopse biográfica e un relato curto escrito polo prpio focense.
No 1975 foi detido pola policía española por acumular propaganda política nun convento melidense
![Publicidade 195634]()
Candidato ao Senado español polo BNPG
Leopoldo Hilario López Rego foi relixioso da orde dos Pasionistas. Candidato ao Senado polo Bloque Nacional-Popular Galego (BNPG) nas eleccións de 1977. Uns anos antes, no tardofranquismo, fora detido por acumular propaganda política no convento melidense onde residía.
A faceta relixiosa de López Rego complementábase coa de avogado. Como tal defendeu a numerosos militantes das Comisións Labregas e a grupos veciñais en conflitos sociais. O seu compromiso provocoulle moitos enfrontamentos coa xerarquía eclesiástica, que censuraba o seu posicionamento político.Na década dos 80, deixou os hábitos e aprobou unha oposición a secretario de concellos.
Paixón e compromiso
Leopoldo desenvolveu "un importante traballo de carácter político, cultural e social; creou asociacións culturais, órganos de expresión escrita, desenvolveu actividades formativas -particularmente entre a mocidade- e agrupou todo o que se movía na comarca de Melide en contra da ditadura", lembraba A. Ansede co gallo do seu pasamento.
