A Deputación de Lugo insta a Xunta a recoñecer oficialmente o 17 de agosto como Día da Galiza Mártir

A proposta presentada polo BNG e apoiada polo PSdG, saíu adiante malia a oposición do Partido Popular.
amalia e valenin G. Boveda
photo_camera Amalia e Valenin G. Boveda no monumento a Alexandre Bóveda na Caeira.

O pleno da Deputación de Lugo vén de aprobar a moción do BNG pola que demandaba a institucionalización do 17 de agosto como Día da Galiza Martir. Así, a institución insta a Xunta da Galiza a recoñecer a data, que coincide co cabodano do fusilamento de Alexandre Bóveda, como "celebración nacional naGaliza, en memoria e homenaxe de todas as galegas e galegos que deron a súa vida ou padeceron o exilio por defenderen as liberdades e dereitos democráticos e nacionais do pobo galego, plasmados dentro do marco constitucional daquela vixente"

A proposta presentada polos nacionalistas, e apoiada polo PSdG, saíu adiante malia a oposición do Partido Popular que no debate plenario "se puxo de perfil" evidenciando un "xiro" que, segundo remarcou o voceiro nacionalista Efrén Castro, "fai que estas propostas, que son unha reivindicación histórica do BNG, sexan hoxe máis necesarias ca nunca".

Homenaxe e defensa dos dereitos democráticos

"O Dia da Galiza Mártir pretende homenaxear as persoas asasinadas e represaliadas por defenderen os dereitos democráticos. As institucións temos a obriga de contar a historia como foi e repoñer as vítimas. Dino todos os tratados internacionais e fano outros estados, independendemente da súa ideoloxía", argumentou o voceiro do BNG e deputado de Memoria Histórica no goberno provincial.

"Por que non queren homenaxear a xente que morreu por defender os valores democráticos. Explíqueno porque non o entendemos", instou á bancada popular o deputado nacionalista que advertiu de que "os posicionamentos do PP fan que no Estado español se estean a discutir día a día valores democráticos firmes".

Ademais de instar á Xunta ao recoñecemento oficial do Día da Galiza Mártir, a proposta compromete á Deputación de Lugo a "promover institucionalmente a celebración de actos protocolarios de rehabilitación pública e política para o primeiro Día da Galiza Mártir que se conmemore e de aí en diante"

A conmemoración do Día da Galiza Mártir foi instaurada en 1942 en Bos Aires, polos galegos no exilio, na honra de Alexandre Bóveda, fusilado na Caeira, en Poio, no 1936, tras un xuízo militar sumarísimo.

Comentarios