Palabras con memoria: fantasiando

antaruxada.- Procesión de vivos (a diferenza da Santa Compaña, que é de mortos) que percorre (percorría) de noite os camiños dunha parroquia. Circulan diversas historias sobre ela.
Lugar de escoita.- Moa - Vilatuxe, Serra do Candán (sudoeste do concello de Lalín).
Fonte.- Daniel Blanco Moa.
Outros apuntamentos.- Aínda que aparece en algún dicionario, a explicación do seu significado resultábanos confusa, polo que nos pareceu ben integrala neste glosario. Evidentemente deriva de antaruxa = meiga.

gatipedro.- Ser mitolóxico de Galicia, creado por Cunqueiro, que ten aspecto de gato branco cun corno negro no medio da fronte e que camiña apoiándose, ademais de coas súas catro patas, coa lingua.
Lugar.- Álvaro Cunqueiro ("Novidades do mundo e fauna máxica" de Escola de menciñeiros)
Fonte.- Claudia Herron Mulet.

marriña.- Persoa semellante a unha meiga, con poderes especiais.
Lugar de escoita.- A zona de Valdeorras.
Fonte.- Ánxeles Ferrer.

pandigueiro.- Home lendario que no tempo de Nadal baixa dos montes e comproba a fartura dos nenos apalpándolles o bandullo e déixalles castañas contra a fame.
Lugar de escoita.- O Courel.
Fonte.- Dun vocabulario courelao.

tabello.- Demo, trasno.
Exemplo.- “Que susto me deches aparecendo así de golpe, pareces un tabello.”
Lugar de escoita.- Santo Adrián de Cobres (Vilaboa do Morrazo).
Fonte.- Sé Anxo Rosales González.