acaneirar.- Facer regos nos prados para facilitar o regadío por todo o prado. Cómpre facelos cunha sacha e dereitiños.
Lugar de escoita.- Canices- Piñor- Cea.
Fonte.- Antonio Moure Narón.
corvello.- Cornello ou cornecho.
Lugar de escoita.- Agolada.
Fonte.- Manuel Cabada Castro.
cucar (2).- Ter as fabas o verme.
Exemplo.- “Se queres que non se che cuquen as fabas, méteas no conxelador.”
Lugar de escoita.- Burela (Mariña luguesa).
Fonte.- Mario Ferreira López.
guizos.- (Ademais doutros significados rexistrados) Varas longas de madeira espetadas na terra por onde gabean as plantas das fabas.
Lugar de escoita.- A Pobra do Brollón e comarca.
Fonte.- Orcelina Parada Cortiñas.
ratuneira.- Morea de peras ou mazás verdes que se poñen na palla ou na herba seca para que maduren.
Lugar de escoita.- O Courel.
Fonte.- Dun vocabulario courelao.
